Shillong, K’Lyngkot 07
Ka Shillong Lajong Football Club kan ïakhun ïa ka jingïalehkai kaba nyngkong eh jong ka Super Cup pyrshah ïa ka Kerala Blasters Football Club ha ka 10 tarik mynta u bnai ha ka por 2 baje mynsngi ha Kalinga Stadium, Odisha na ka bynta ka lympung Kalinga Super Cup 2024.
Ha kane ka lympung, ka Shillong Lajong ka la don ha ka Group-B kaba kynthup ruh ïa ki club jong ka Indian Super League, kata ka Kerala Blasters FC, North-East United FC bad ka Jamshedpur FC.
Ka kynhun jong ka Shillong Lajong kan mih lashai ka sngi ka 8 tarik ban leit sha Odisha ban pynkhreh ïa kane ka lympung. Kane kan dei kawei na ki kabu ba jwat ba kum ka kynhun kan lah ban pynpaw ïa la ka jong ka jingtbit naba kan ïakhun pyrshah ïa ki kynhun kiba khlaiñ bor.
Ka Shillong Lajong kan dei kawei na ki saw tylli ki club na ka lympung I-League ba kynthup ïa ka Sreenidi Deccan FC, Gokulam Kerala FC bad kawei pat ka kynhun kan dei napdeng kiba jop ha ka playoff ka ban long hapdeng ka Rajasthan United FC bad ka Inter Kashi, kynthup ïa ki 12 tylli ki club ka ISL, kaba la pynlong baroh 16 tylli na ka bynta kane ka lympung, ha kaba la phiah haduh saw tylli ki group bad kynthup saw tylli ki kynhun ha kawei kawei ka group.
Baroh ki jingïalehkai kane ka lympung, yn pyni ‘live’ ha ka Jio Cinema.
Ki rangïalehkai ka Shil -long Lajong FC ki kynthup Goalkeepers: Rajat Paul Lyngdoh, Neithovilie Calieu, Bishal Lama. Defenders: Ronney Will-son Kharbudon, Kynsai-lang Khongsit, Allen Cam -per Lyngdoh Nongbri, Saveme Tariang, Daniel Goncalves, Kongbrilat-pam Manjit Sharma. Midfielders: Hardy Cliff Nongbri, Ronaldkydon Lyngdoh Nonglait, Hame damanbha Wahlang, Wada -jied Kynsai Ryngkhlem, Sangti Janai Shianglong, Renan Paulino De Souza bad Forwards: Kynsaibor Lhuid, Denzil Kharshandi, El Hadji Abdou Karim Samb, Douglas Rosa Tardin, Laiwang Bohham, Pursunep Longkumer.
