Shillong, K’Lyngkot 07
Ka Meghalaya ka la khur jingjop kaba nyngkong ha ka jingïalehkai jong ka lympung Ranji Trophy Plate Group kaba la long ha Anand, Gujarat ha ka Sngi U Blei hadien ba ka la pynliem noh ïa ka Arunachal Pradesh.
Haba phai sha ka jingïalehkai, ka Meghalaya ka la lah ban pynliem noh ïa ka Arunachal Pradesh da ka innings (pali) bad 172 run. Kane ka wan ruh lyngba ka jinglah u Dippu Ch Sangma ban khur haduh 9 wiket bad ai 72 run ha kane ka jingïalehkai.
U Dippu Ch Sangma u la khur 5 wiket bad ai 54 run ha ka pali kaba ar, kaba la pynlong ïa ka Arunachal Pradesh ban lah kamai tang 238 na ki 84.5 over bad hap lut baroh ki wiket. Kane kan dei ruh ka jingkhur 5 wiket kaba nyngkong jong u Dippu ha ka BCCI domestic cricket, hadien ba u la khur 4 wiket bad ai 18 run ha ka pali kaba nyngkong.
Kum ban shu pynkynmaw, ba ka Arunachal Pradesh kaba la tied nyngkong ha ka pali ba nyngkong ka la lah ban kamai tang 94 run, katba ka Meghalaya ha ka pali ba nyngkong ka la tied haduh 504 run bad hap 9 wiket bad kane ka la wan urlong lyngba ka jinglah ban tied bun run jong u Kishan Lyngdoh, uba la tied haduh 268 run (kaba dei ruh ka 200 run tam kaba nyngkong ha ka Ranji Trophy da u rangïa-lehkai ka Meghalaya) bad ka 132 run ba la tied da u Ram Gurung.
Watla ki la lah ban ïalehkai bha ha ka pali kaba ar, bad bteng ka jingïalehkai na ka jingkamai 57 run bad hap 2 wiket, hynrei ki nongtied ka Arunachal kim shym la lah ban shan hakhmat ki nongkawang bol ka Meghalaya ne ban ïaleh bad pyrshang ban phah tied biang ïa ka Meghalaya.
“Ka jingkhublei ba kyrpang ka leit sha u Dippu Sangma uba la khur haduh 5 wiket,” la ong u President ka Meghalaya Cricket Association u Nababrata Bhattacharjee hadien ka jingïalehkai.
Mynta pat ka Meghalaya kan wan phai sha la ïing ban pynkhreh ïa ka jingïalehkai kaba kham eh ka ban long pyrshah ïa ka Hyderabad naduh ka 12 tarik mynta u bnai ha madan MCA, Polo.
Ka Hyderabad ruh ka la jop ïa ka jingïalehkai sdang da ka innings bad 194 run kaba la long pyrshah ïa ka Nagaland. Watla ha kane ka aiom, ki la don ha ka plate group, ka Hyderabad kan dei pat kawei na ki kynhun kaba khlaiñ bor bad kumta kane ka jingïakhun kan long kaba itynnad bha hapdeng ka Meghalaya pyrshah ïa ka Hyderabad.
