Agartala, K’lyngkot:
Ha ka por ba la pynlong ïa ka dorbar jong ka bynta kaba 13 ha Tripura Legislative Assembly, la pynpaw ba kumba ka la long haduh ka 31 tarik, Risaw, 2023, ki la don kumba 49,020 tylli ki mukotduma kiba dang sahteng khlem pat lah ban bishar bniah ha kiba bun ki ïingbishar kiba don ha ka jylla.
Ha ka jingai jubab halor ki jingkylli ba la buh da ki MLA jong ka seng CPI-M ka Tripura u Nirmal Biswas bad u MLA ka Tipra Motha u Animesh Debbarma, ka Tripura tnat Law ka la pynbiang ïa ka jingsangeh treikam jong ki mukotduma.
Kumba la ïathuh ka tyllong khubor, la ong ba ki la don kumba 1211 tylli ki mukotduma ïa kiba la ap na ka bynta ka jingkhmih bniah ha Tripura High Court, katba ki 47,809 tylli ki mukotduma ba dang sah, kiba kynthup ïa 11,896 tylli kiba dei halor ki kam beaiñ kiba kham rit bad 35,913 tylli kiba long pyrshah halor ki kam beaiñ kiba kham triem, ki dang sah khlem pat bishar bniah hapoh ki ïingbishar.
Kine ki MLA ki la dawa ruh ba la dei ban pyntip halor ka jingdon jong ki kam beaiñ kiba long pyrshah ïa ka sorkar Tripura ha High Court bad Supreme Court kiba long haduh ka 31 tarik, Nailar, 2023.
U Myntri uba dei khmih halor kane ka bynta u la ong ba haduh mynta ki la don kumba 535 tylli ki mukotduma kiba dang sah kiba long pyrshah ïa ka sorkar jylla ha Tripura High Court bad 266 tylli ki mukotduma kiba dang ap ban khmih bniah ha ka Supreme Court.
