La Paz, Kyllalyngkot:
Ki bor pyniaid ka Bolivia ha ka Sngi Thohdieng ki la pynbna ba ki pulit ka ri na ka thaiñ Mihngi jong ka Oruro ki la ioh kurup ia shibun bah u drok ‘Cocaine’ na katei ka thaiñ. Utei u drok u dei ba shong dor kumba $224 Million hynrei ka dor kan kham kiew shuh shuh ha Europe ha kaba la ju shalan bad pyndonkam tuh ia utei u jait jingdih pynbuaid.
U President ka Bolivia- u Luis Arce u la pynbna ba utei u drok ba la ioh kurup u la don kumba 8.8 Metric Ton bad u long ruh uba bun tam ba katei ka ri South America kan ioh kurup ha une u snem. Nalor kata, u la iathuh ruh ba ia utei u drok la buhrieh ha ki bynta ba sha khrum ne ka bynta ba shapoh jong ka trok ba la pynkit bad ba la thmu ban shalan. La suba ruh ba ia utei u drok la thmu ban pynpoi sha Netherlands ha kaba ka dor jong u ka lah ban poi kumba $526 Million ynda la poi sha katei ka ri.
Ha katei ka sngi, ki pulit ki la ioh kurup noh ia utei u drok bad la ioh kem ruh ia 4 ngut ki suba nongkhaïi droks be-aiñ kiba la ioh sei bad ioh bat na ki 9 tylli ki jaka ba ki pulit bad ka tnat syntiat ki la leit ban khynra bad bud dien.
Shuh shuh ruh la ong ba ia utei u drok la thep ha ki kynja synduk lane ki jingsong kiba kum ki lyntang lyngkhot khnang ba kin ym don ba suba ba un dei u droksne utei u jingdih pynbuaid uba ki thmu ban khaii be-aiñ bad pynpoi sha Netherlands kumba la suba.
