United Nations, K’lyngkot:
U heh ka United Nations, u Martin Griffiths ha ka Sngi Thohdieng u la ong ba ka Gaza ha kane ka por ka la kylla long ka madan thma bad ka jaka bret metiap namar ka jingther bom ba khlem sangeh jong ka Israel naduh ba sdang jong ka thma haduh kane ka kynti tang namar ka jing-leh jong ki lehnoh Hamas kiba la leit ban hiar thma kyndit kynsan ia ka Israel ha ka 7 tarik u Risaw, 2023. Dei naduh katei ka por ka Israel ka la pynpaw ia ka jingbitar bad smai ba kan pynhiar kput bad kan pynduh jait noh syndon ia katei kynhun lehnoh (Hamas) kaba lah ban long ka jingma kaba khraw ym tang ia ka Israel hynrei ia kiwei pat ruh ki ri ha ki por ki ban wan.
Namarkata la ong ba naduh katei ka 7 tarik jong utei hi u Risaw, ka Gaza ka la kylla long ka jaka bret metiap bad ka madan thma namar ka Israel kam shym ailad shuh wat tang ia ki riew paidbah ba kin ioh jaka rieh tngen bad kin ioh ka jaka ka ban ai jingiada ia ki ba kin lait na ki jingma jong katei ka thma.
La ong ruh ba kitei ki paid nongshong shnong ba lui-lui hapoh Gaza kim lah shuh ban batai ia ka jingim bad jingïap jongki namar kam don jingshngaiñ shuh ia ka jingim jongki bad kat sha ba ki phai ki lah ban ngat ha ki bom bad ki ‘namding jong ka Israel.
Kumjuh ruh la ong ba na ka liang jong katei ka tnat, kam lah shuh ban dang bteng ne pyniaid ia ka jingpynpoi ia ki lad jingiarap sha kitei ki paid nongshong shnong ka Gaza namar ka jingbym ailad jong ka thma bad kaba la wanrah pat ia kiwei ki jingeh kiba bun ha ki liang bapher.
Kumba long mynta, wat haba la iohi ba kiba bun ki thaiñ jong ka Gaza ki la kylla shyiap bad um lut, hynrei ka Israel pat kam shym la sangeh ne ailad noh ia ki paidbah ba kin ioh shongthait bad kin ioh im noh ia ka jingim kaba suk bad ba shngaiñ kumba long ki briew jong ka Israel ha kane ka por watla ki dang don hi kumba katto katne kiba dang shah bat ha ki lehnoh Hamas hynrei ki paid nongshong shnong ka Israel ki la lait na ki jingma jong ka thma namar ka thma ha kane ka por ka la poi sha Gaza ym dei shuh ha Israel kumba ki lehnoh Hamas ki leit ban sdang nyng-kong eh ia ka thma.
