Dhaka, Kyllalyngkot:
Ha kane ka jingjia la ong ba 5 ngut ki la khlad hadien ba kawei ka rel kit pasenjar ka la kem ding ha ka Sngi Thohdieng, ha kaba ki pulit ki la suba ba ka jingkem ding jong katei ka rel ka long namar ka jingiakynad bad jingïashrut jong ki arliang kynhun hynrei haduh jong ka step Sngi Saitjaiñ ruh ki pulit kim pat shym la ioh kem ia kitei kiba don kti ha katei ka kam.
U heh ka tnat pynlip ding- u Rakjibul Hasan u la ong ba 4 ngut ki briew ki la kem ding ha katei ka Benapole Express bad kiba la leit poi sha Dhaka na ka nongbah Jessore kaba don sha ki thaiñ West.
U heh pulit Khandaker Al Moin haba iakren bad ki lad pathai khubor u la iathuh ba la ioh ban sei noh ia kitei ki 5 tylli ki metiap na katei ka jaka bad la ioh jingtip ruh na ki nongsakhi ba katei ka rel ka la kem ding ha Gopibagh.
Uwei na kitei ki nongïarap ha katei ka jingjia, u la iathuh ha ki pulit ba da ki spah ngut ki briew na katei ka thaiñ ki la mih ban leit tan bad iarap pynkynriah ia ki briew kiba don hapoh jong ka rel tang mar ia iohi ia katei ka jingkem ding ha katei ka sngi.
Hynrei u la iathuh ba watla ki briew ki la ialeh ban pynkloi ia ka jingiarap, pynban katei ka ding ruh ka la kloi ban kem ding stet bad kaba la pynlong ia kitei ki 5 ngut ba kin duh ei noh ia ka jingim ha katei ka jingjia.
La ioh jingtip ruh ba ki don katto katne ngut ki nong India kiba shong ha katei ka rel hynrei ym pat lah ban pynithuh ia kitei ki 5 ngut kiba khlad bad ia ka shnong trai jongki yn sa lah ban pyntip hadien ynda la dep ban peit thuh bad wad jingtip bniah shuwa.
Hynrei ki pulit ki la suba ba ka jingkem ding jong katei ka rel, ka lah ban long namar ka kam dusmon bad ka jing thang khnang jong ki kynhun kiba don jingiashun bad kito kiba don ha katei ka rel.
Dang shen ha une u bnai ba la lah, ki pulit bad ka sorkar ki la kynnoh ia ka liang pyrshah jong ka Bangladesh- ka seng Bangladesh Nationalist Party (BNP) haba iadei bad kawei pat ka jingjia pluh rel kaba la shim ia ka jingim jong 4 ngut ki briew ha katei ka por.
Hynrei na ka liang jong ka seng BNP, ka la kyntait ia katei ka jingkynnoh bad ong ba katei ka long tang ka jing pharep ban pynbud-nam ia katei ka seng bad ban pynthame ia ki nongkyrshan ba ratbah jong katei ka seng khamtam ha ki ilekshon ki ban wan.
Ka Bangladesh ka la dei ban pynlong ia ka ilekshon paidbah ha ka Sngi U Blei bad da ki hajar ngut ki nongkyrshan jong katei ka seng BNP ki la shah kem ha une u snem ba la lah namar ki jingiakhih bad ki jingialang paidbah ha utei u snem.
