Itanagar, K’lyngkot:
Ka Arunachal Pradesh ka la dep ban pynrung kyrteng ïa 2.87 per cent ka jingdon jong ki nongthep vote, katkum ka jingkhmih bniah ha ka sngi Thohdieng na ki jingpynrung kyrteng.
Katkum ka thup kyrteng ba la pyllait da ka Election Commission of India (ECI), la ong ba ki nongthep vote ha ka jylla ba shaphang Shatei-lam-Mihngi ki la don baroh 8,82,816, kynthup ïa 4,33,760 ngut ki shynrang bad 4,49,050 ngut ki kynthei.
Ki la don ruh kumba 6 ngut ki nongthep vote kiba don ïa ka jinglong kynthei bad shynrang ha ka jylla, la ïathuh u Joint Chief Electoral Officer jong ka jylla u Liken Koyu. Ki la don baroh kumba 26,629 ngut ki nongthep vote kiba dang shah pynrung kyrteng thymmai mynta.
Ka jingdon jong ki nongthep vote kiba dei ki shynrang ka la kiew sha ka 12,806 ngut, katba 13,822 ngut ki dei ki kynthei. La ïoh pynrung kyrteng shuh sa iwei ba don ka jinglong kynthei bad shynrang.
Ha ka jingpynrung kyrteng kaba hashwa, ki la don baroh kumba 8,56,187 ngut ki nongthep vote, kynthup ïa 4,20,954 ngut ki shynrang bad 4,35,228 ngut ki kynthei bad san ngut ki nongpynrung kyrteng kiba don ïa ka jinglong kynthei bad shynrang.
