Wajima, K’lyngkot:
Katkum ka kaiphod ba la ioh lum thymmai ha ka Sngi Saitjaiñ, la ong ba ka jingdon jong kiba khlad na u jumai bah ha Japan uba la khynñiuh ha ka 1 tarik u 2024 ka la kot ia ka 100 tam bad palat 200 ngut pat ki dang jah rngai. Utei u jumai, la ong ba u long uwei na ki jumai ba shyrkhei tam ba ka Japan kam ju ioh mad shuh mynta la kumba 8 snem.
La ong ba utei u jumai u dei uba khlaiñ bor uba don ha ka jingkhlaiñ haduh 7.6 Magnitude. U la pyn khynñiuh ia ka thaiñ rud duriaw kiba sha ka phang Mihngi jong ka Japan ha kaba palat 23,000 tylli ki iing briew ki la hap ban shu shong khlem bor ding ilektrik ha ki bynta jong ka Hokuriku.
Kumta la ong ba ki tnat iarap jong ka Japan mynta la hynriew sngi kynthih ki dang ialeh shitom ban wad ia kitei ki spah ngut kiba dang jah rngai da kaba leit khynra bad khyllie ia ki kynrum-kynram kiba la tap ia ka madan ha kito ki ïing mala bad ki iing kiba la julor na utei u jumai. Ki bor pyniaid ki la ioh ban pynkynriah noh ruh ia kumba 30,000 tam ki nongshong shnong na katei ka jaka hynrei kitei ki paidbah ki dang ap ia ki lad jingiarap ki ban wan poi hadien ba ki la duh lut ia ki jingdon-jingem bad ki jingdonkam jong ki baroh namar jong utei u jumai ba shyrkhei ha katei ka 1 tarik jong une u snem 2024 ba thymmai.
Katba, ha katei ka step la ioh jingkheiñ ruh ba sa 16 ngut pat ki dei kbia dang shu dep pyntip ia kiba la ioh tam ia ka metiap jong ki na ka nongbah Wajima bad na ka shnong Anamizu ha ka por 1 nohphai sngi jong ka Sngi Saitjaiñ.
Tad haduh jong ka step Sngi Saitjaiñ, la ioh jingtip ba 98 ngut ki dei kiba la tikna bad la dep pynbna iap katkum ka website pathai jingtip jong ka Ishikawa.
La ong ba katei ka jingdon jong kiba khlad ha kane ka sien, ka la jur bad bun tam haba peit ia ka jingkhlad ki briew ha Kumamoto jong ka thaiñ Southwest ka Japan naduh ba la sakhi ia ka jingdon jong 276 ngut kiba la khlad ha u jumai uba jur uba la khynñiuh ha u snem 2016.
kumta la ong ba utei u jumai u la wanrah ia shibun ki jingeh ha kitei ki thaiñ ba marjan naduh ka jingthud ki surok- ki lynti- synkien bad kiwei de ki jingeh ba ki paidbah nongshong shnong ki hap ban mad namar ki jingjulor bad jingthud ka bor ding bad kumjuh ruh ha ki liang ba bun.
Hynrei haduh mynta la ong ba ki bor pyniaid jong ka Japan kim pat shym la pyntrei ne pynbha ia kitei ki surok bad ki jingtei ki ban pynsuk bad ki ban iarap ia ki riew paidbah khamtam ha kum kine ki por ba kynduh jingeh ba dei ban pynbiang noh kloi ia ki jingdonkam kiba man la ka sngi.
