Shillong, K’Lyngkot 07
Ka Tottenham Hotspurs ka la mynjur ban soi ïa u rangïalehkai shakhmat ka RB Leipzig u Timo Werner na ka bynta kaba sah jong kane ka aïom bad ban ïaleh ruh ban soi pura ïa une u rangïalehkai ha kaba kut jong kane ka aïom.
Une u rangïalehkai shakhmat ba la 27 snem ka rta, un sa leit sha London na ka bynta ban pyndep ïa ka jingdonkam ha liang ka koit ka khiah, ha kaba ka Tottenham kan hap ban lut baroh nadong shadong haduh ka jingsiew sha une u rangïalehkai haduh ba kut jong ka aiom.
U Werner um long thymmai shuh, hynrei u la dep ban mad ïa ka jingïakhun ha ka lympung Premier League ha ka por ba u dang ïalehkai na ka Chelsea ha u snem 2020 hadien ba u la pynïasoh sha ka club ha ka dor kaba £45m na ka RB Leipzig.
Une u rangïalehkai shakhmat ka Germany u la ïoh ban thep haduh 23 tylli ki kol na ki 89 tylli ki jingïalehkai na ka bynta ka Chelsea bad ha u snem 2022 u la leit phai biang sha ka Leipzig.
Ha kane ka aiom ba mynta, u dang ïoh thep tang 2 tylli ki kol na ki 14 tylli ki jingïalehkai ha ka lympung Bundesliga. Une rangïalehkai um lah ban ïadon bynta pat ha ka jingïalehkai paralok ha ka sngi Saitjaiñ pyrshah ïa ka St Gallen namar ka jingdon ka jingïakren ba un leit sha Tottenham.
U Manager jong ka Leipzig u Marco Rose u la dep ruh ban pynthikna ïa ka jingleit pynïasoh une u rangïalehkai shakhmat sha ka Tottenham.
U Timo Werner u la ïoh mih madan haduh 57 sien na ka bynta ka Germany hynrei ka sien ba khatduh ba u la ïalehkai na ka bynta ka ri ka dei ha ka jingïalehkai paralok pyrshah ïa ka Belgium ha u bnai Lber jong u snem 2023, ha kaba ka Germany ka la shah rem noh.
Kumba ka long mynta, ka Tottenham Hotspurs ka dang khmih lynti ban pynkhlaiñ noh ïa ka bynta ba shakhmat, hadien ba u Son Heung-min mynta u don bad ka South Korea na ka bynta ka lympung Asian Cup katba u James Maddison pat u dang don hapdeng ka jingshitom.
Ka jingïalehkai ban wan jong ka Tottenham ha ka lympung Premier League kan long pyrshah ïa ka Manchester United ha ka 14 tarik mynta u bnai.
