Chennai, Kyllalyngkot:
Ka Sri Lanka ha ka Sngi Thohdieng ka la pyllait noh ia 21 ngut ki nongtong doh na India kiba dei na ka nongbah Chennai jong ka ri India. Kitei nongtong don ki la shah bat ha ki por ba la leit namar ka jingleit tam beaiñ sha u pud-u sam jong ka Sri Lanka.
La ong ba kitei 21 ngut ki la shah bat noh ha ki shipai duriaw jong ka Sri Lanka namar ka jingleit tong doh be-aiñ na ki bynta ba markhap bad la ngeit ruh ba katei ka jaka ba ki leit ban tong doh ka la tam ia u pud-u sam jong ka India hynrei ki la leit poi sha ki um duriaw kaba la hap sha ka liang jong ka Sri Lanka.
Haba iadei bad kane, la iathuh ba ki don kumba 33 tylli ki lieng ne ki jhad tong doh bad kumba 220 ngut ki nongtong doh na India kiba la shah bat noh ha ka Sri Lanka hapoh jong u snem 2023 namar kitei hi kijuh ki jingpharep leit tong doh be-aiñ shabar u pud-u sam jong ka India.
