New Delhi, K’lyngkot:
Ki shipai ïada khappud ki la nang pynjur ïa ka jingpahara bad ka jingpeitngor ha kaba ïadei bad ka jingïai bteng jong ki nong Pakistan ban pynpoi bad khaïi ïa u Heroin na Pakistan. Kane ka la long hadien ba la sakhi kum kine ki jait kam ki la nang jur katba nang mih ki sngi khamtam ha ki thaiñ kiba don ha ki bynta khappud jong ka Rajasthan.
Ha kaba ïadei bad kane ka kam sniew, ki riewshimkabu ki la pyndonkam da ki Drone ha kaba ïadei bad ka jingkhaïi ïa u drok, ha kaba kane ka bynta ka la shah khmih bniah, la ïathuh ka tyllong khubor.
Kumba la sakhi, la ong ba ïa u Heroin la phah na kylleng ki bynta khappud lyngba ka jingpyndonkam da ki Pipe, ha kaba kane ka la don hapoh ka jingshah khmih bniah. Ha u snem ba la lah, kumba la sakhi la ïoh ban kurup ïa kiba bun jait ki jingdih pynbuaid na ki bynta khappud jong ka Pakistan kaba marjan bad ka Sri Ganganagar distrik.
Ym tang ki nongkhaïi tuh, hynrei kaba ma mynta ka long ba ki lehnoh ruh ki la nang pynjur ïa kum kine ki kam ha ki bynta khappud nalor u drok ki la pyndonkam ruh ban pynpoi da ki Drone ïa ki tiar siat.
Ha kaba ïadei bad ki rukom pynkylla halor ki kam jong ki lehnoh mynta la paw ba ki la pyndonkam da ki pistol na ka bynta ki kam pynïap briew ha Kashmir. Kumba la sakhi, la ong ba kane ka la long hadien ba la lap ïa ki pistol ba la pynhap ha ki bynta khappud, ha kaba la ong ba kine ki atiar ki long ki rukom pyntreikam bathymmai na ka bynta ba pynïap ïa ki shipai ïada khappud ha Kashmir.
