Shillong, K’Lyngkot 07
Ka Chelsea ka la ïoh ban buh jaka ïalade sha ka kylla kaba saw ha ka lympung FA Cup, hadien ba pynliem ïa ka Preston kaba don ha ka lympung Championship ha ka jingïalehkai kaba la long ha Stamford Bridge ha ka sngi Saitjaiñ.
Haba phai sha ka jing-ïalehkai, ka Chelsea ka la jop ïa ka Preston da 4-0 kol. ïa kine kol la ïoh ban khyrwit da u Armando Broja ha ka minit kaba 58, pynbud sa na u Thiago Silva ha ka minit kaba 66, u Raheem Sterling u la ïoh khyrwit ka kol ba lai ha ka minit kaba 69 bad ïa ka kol ba saw la thep da u Enzo Fernandez ha ka minit kaba 85.
Ha ka kylla step, ka Preston ka la ïakhun tyngeh bad ïaleh ban ñion naphang haba ka ïoh ïa ka kabu hynrei ka jingkhlaiñ ban ïada ki rangïalehkai dien, ka la khanglad ïa ka Preston ban ïoh khyrwit kol.
Hadien kane ka jing-jop, ka Chelsea mynta kan pynkhreh pat ban ïakhun ïa ka bynta ba nyngkong (first leg) jong ka semi-final ha ka lympung Carabao Cup pyrshah ïa ka Middlesbrough ka ban long ha ka sngi Ba-ar.
Ha kawei pat ka jing-ïakhun, ka Aston Villa ka la jop ka jingïakhun ha ka lympung FA Cup ha ka sien kaba nyngkong eh, kata naduh u snem 2016 hadien ba u Matty Cash u la ïoh ban thep ka kol jong ka jingjop ha ka jingïa-khun pyrshah ïa ka Middlesbrough.
Haba phai sha ka jing-ïalehkai, ka Middles-brough kaba dei ka kynhun kaba don ha ka lympung Championship ka la jan ïoh ban ïakhun biang ïa kane ka jingïalehkai hynrei ha ka minit shwa ban wai, u Matty Cash u la ïoh ban khyrwit ïa ka kol kaba la long thik kumba theh umpjah.
Ha shwa kane, na ka liang u nongap kol ka Middlesbrough u Glover uba dei na Australia u la lah ban ïada bad khanglad ïa ka kol na ki rangïalehkai shakhmat ka Villa ha ka jingïalehkai kaba la long ha Riverside Stadium, ha kaba u la lah ban ïada ar sien ïa ka bol ba la shut da u Jhon Duran bad ruh kumjuh na u kapten u John McGinn.
Ka Villa kaba la jop haduh hynñiew sien ïa ka FA Cup, kata ka sien ba khatduh ba ka la rah ïa ka nam lahduh ka la dei ha u snem 1957, bad kane ka jingjop ba mynnin kan dei ruh ka jingjop kaba nyngkong eh ha kane ka lympung, kata naduh ba ka la lah ban pynliem ïa ka Wycombe ha ka round kaba lai ha u snem 2016.
Hadien kane ka snem, ka la mad haduh phra tylli ki jingshah rem ha kane ka lympung, kynthup ruh pyrshah ïa ka Peterbo-rough kaba don ha ka League One ha u snem 2018 bad ka Stevenage kaba don ha ka League Two ha u snem 2023.
“Ngi la ïakren ha shwa jong ka jingïalehkai ha kaba ïadei bad ka FA Cup, ka jingïakhun kaba don nam bha, kaba lah ban dei ruh kawei na ki lympung kaba paka tam ha ka pyrthei,” la ong u Mana-ger ka Villa u Unai Emery.
U la ong, “Ka jinglah jong ka Villa ban khur ïa ka nam lahduh jong kane ka lympung ka la long ha ki snem kiba jrong bha kiba la leit noh, ha kaba ka la rah haduh 7 sien, kumta mynta ngi dang pyrshang ban ïakhun tyngeh bad wanrah biang ïa kata ka nam kaba kane ka club ka la ju ïoh ha kita ki phew snem kiba la leit noh.”
