Shillong, K’Lyngkot 07
Ka Mawsawrit Sports Club ka la rah ïa ka nam lahduh jong ka lympung ïalehkai phutbol kaba la pynlong da ka seng Hynñiewtrep Achik National Movement (HANM) Tyrsad Circle hadien ba ka la lah ban pynliem noh ïa ka Niamsang Sports Club ha ka jingïalehkai final.
Haba phai sha ka jingïalehkai final kaba la pynlong ha ka sngi Saitjaiñ ha madan Lynter Mawsadang, ka Mawsawrit Sports Club ka la pynliem noh ïa ka Niamsang Sports Club da 2-0 kol bad rah syndon ïa ka nam kum ka lahduh.
Ha kane ka sngi, u Bah Venus Rangslang uba dei u Publicity Secretary ka HANM u la ïadon lang kum u kongsan. Kane ka lympung ba la pynlong da ka HANM ka long ruh kum shi bynta ban rakhe ïa ka jingdap shi snem jong ka seng.
Ïa ka khusnam kaba long da ka song pisa kata T.10 hajar sha ka lahduh ka Mawsawrit SC la sam da u Finance Secretary ka HANM Sengkmie bad ïa ka khusnam kaba ar kata sha ka Niamsang SC kaba long T.5 hajar la sam da u Rangbah Kur Hynniewta, uba long trai ïa ka madan phutbol.
