Kolkata, K’lyngkot:
U nongïalam jong ka Trinamool Congress (TMC) u Shankar Adhya u la shahkem ha ka kynhun Enforcement Directorate (ED) halor ka jingshah pynshisha ba u la bamsap lyngba ka jingsam Ration.
Kane ka jingshahkem jong u ka la long shi sngi hadien ba ka kynhun ED, kaba la don ha ka lynti ban leit pynlong ïa ka jingkhynra sa ïa kawei pat ka ïing jong uwei pat u nongïalam jong ka seng TMC, ka la shah thombor.
U Shankar Adhya, uba long u Chairman barim jong ka Bangaon Municipality, u la shahkem ha ka miet sngi thohdieng hadien ba ka la don ka jingleit thwet kaba 17 kynta da ka kynhun ED ha ki jaka ba don ka jingïadei bad u ha North 24 Parganas distrik kaba don ha West Bengal.
Ka kurim jong u ka Jyotsna Adhya ka la pynshisha da kaba ong ba u kurim jong ka u la shahkem wat lada u la ïatreilang bad ka kynhun tohkit ha ka por ba u la shah tohkit. Hadien katei jingshahkem, ki nongkyrshan jong u Adhya ki la pyrshang ban khang lynti ïa ki nongtohkit ba kin ïalam ïa u bad nalor kane ki la kawang maw ruh ïa ki kali jong ki. Ki CRPF kiba la synran lang ïa ka kynhun ED ki la bom lathi naphang ïa ki paidbah kum shi bynta ban tehlakam ïa ka jingtur pyrshah jong ki.
