Shillong, K’Lyngkot 07
U khlur ïalehkai tennis u Rafael Nadal u la weng noh ïalade ban ïashim bynta ha ka lympung Australian Open bad un leit phai noh sha Spain na ka bynta ka jingsumar hadien ba u la shitom ha ka lympung Brisbane International.
U Nadal, ba la 37 snem ka rta, u la hap ban ap slem ban wan phai biang sha ka lympung ïalehkai, hadien ba u la duh haduh shi snem namar ka jingshitom, ha kaba u la khur ar tylli ki jingjop ha Brisbane.
Hynrei u la mynsaw bad shitom noh ha ka jing ïalehkai quarter-final kaba u la shah rem ha u Jordan Thompson kaba la long ha ka sngi Thohdieng jong ka taïew ba la leit.
U Nadal u la ong, ba ka jingleh scan ka la pyni ïa ka jinglait doh kaba rit hynrei kam shym la dei pat ha kajuh ka bynta ba la pynlong ïa u ban duh ïalehkai haduh shi snem tam.
U Nadal na Spain, uba khlem mih madan ne ïalehkai shuh wat kawei ruh ka jingïalehkai ha kine ki 349 sngi shwa ka jing-jop pyrshah ïa u Dominic Thiem ha ka jingïalehkai sdang, u la ong ba kane ka jingjop ka long shisha ka khubor kaba bha hynrei um pat long pat uba la khreh ban ïakhun ha ki lympung kiba heh.
U la ong ha u Jym-mang, hadien ba u la hap ban duh noh ïa ka lympung French Open ha ka sien kaba nyngkong eh ha ki 19 snem, ba u snem 2024 u lah ban dei u snem ba khatduh na ka bynta ka jingim ïalehkai ka jong u, kaba mut ba u la dep ban ïalehkai lypa ïa ka lympung Australian Open, ka lympung kaba u la jop ar sien.
Hynrei watla ka jing-mynsaw bad shitom ka la long mar jan na ka jaka kaba la pynlong ïa u ban duh ïalehkai palat shi snem, ka la paw pat ba kane kam da dei eh kaba u sheptieng.
“Nga la trei shitom ha kine ki snem ban wan phai biang bad kumba ju long hi, ka thong ka jong nga ka long beit ban don ha ka kyrdan kaba nga ju don ha kine ki 3 bnai ban wan,” la ong u Nadal lyngba ka rynsan social media.
“Nga la kwah shisha ban ïalehkai ha Australia bad nga la ïoh katto katne ki jingïakhun ban ïalehkai kaba la pynkmen shi katdei eh ïa nga,” u la ong bad bynrap “Khublei shibun na ka bynta ka jingkyrshan ka jong phi bad kyrmen shen ngin sa ïakynduh biang.”
Ka lympung Australian Open kan sdang ha Melbourne naduh ka 14 tarik mynta u bnai.
Hadien ka jingduh noh ïa ka Australian Open, u Nadal mynta un pynkhreh bad phai khmat ban pynbit pynbiang ban lah ban koit ha ka por shwa ban sdang ka lympung French Open ka ban sdang ha ka 20 tarik Jymmang.
Namar ka jingweng noh jong u Nadal, kane kan dei ka sien ba nyngkong ha ka lympung Australian Open kata naduh u snem 1999, khlem u Nadal lane u Roger Federer, uba la shongthait ha u snem 2022, ban ïakhun ha ka men’s singles.
