New Delhi, K’lyngkot:
Ka sorkar kmie kumba ka la thmu kan sa ïai bteng ha ka ban ithuh bad phah lum kyrteng ïa ki nongbylla nangne shakhmat.
Kumba la sakhi, la ong ba ki la nang don shuh shuh ki nongbylla kiba la pynrung kyrteng kumba la bthah. Hashwa kane, kum shi bynta ban pynsuk bad ai jingmyntoi ïa ki nongtrei bylla khamtam ïa kito kiba dei ban trei shabar jylla, ka la kyntu ïa ki sorkar jylla ba ki dei ban bthah ïa ki nongtrei bylla ba ki dei ban pynrung kyrteng ïalade hapoh ka Portal ba la buh.
Ka sorkar kmie ka la pynshisha da kaba ong ba na ka jingkhmih bniah ki la don bun ki nongtrei bar jylla ki bym pat shah ithuh ki la pynrung kyrteng ha ka Portal ka ba ïarap ha ka ban lah ban ïakren bad ka National Informatics Centre (NIC) ha kaba ïadei bad ka jinglum jingtip ba la ai da ki jylla jong ki.
Ka Additional Solicitor General ka Aishwarya Bhati, kaba la mihkhmat na ka bynta ka sorkar kmie, ka la ïathuh ha ka kynhun jong ki nongbishar kaba kynthup ïa u Justice M R Shah bad u Justice B V Nagarathna ba ka Portal ka la ïarap ha kaba ïadei bad ka jingïoh ban ïakren bad ka NIC na ka bynta ban pynrung kyrteng ïa ki nongtrei bar jylla.
“Kawei na ki bynta bad ki jingtyrwa jong ka jingpynrung kyrteng ka long ban pyntikna ba ki skhim ai jingïarap da ka sorkar kmie ne ki sorkar jylla kin poi sha ki nongbylla ne ki nongtrei bar jylla ki bym pat shah ithuh ne pynrung kyrteng,” la ong ka ïingbishar bahakhliehduh.
Ka ïingbishar ka la hukum ïa ka sorkar kmie ba ka la dei ban ïaleh ban pynbiang ïa baroh ki jingdonkam ha kaba ïadei bad ka jingïoh jingtip na ki jylla khnang ba ka jingpyntreikam ka ban ïaid shakhmat kan lah ban ïada ïa ka hok jong kito ki nongbylla bad ki nongtrei bar jylla ki bym pat shah ithuh ha ka sorkar khnang ba kin ïoh jingmyntoi.
