Bengaluru, K’lyngkot:
Ka paidbah kiba la ai ka jingkyrshan ïa ka seng Congress ha ka ilekshon kaba la dep ki la don jingkyrmen ba kin sa ïoh jingmyntoi lada ka sorkar ka pyntreikam ne pynurlong ïa baroh ki jingkular ba ka la buh ha ka por ilekshon.
Ka seng na ka por sha ka por ka la ïai ban ha ka ban pynbna ïa ki jingkular na ka bynta ka ilekshon Assembly ha Karnataka bad ka la pynbna ba kan sa pyntreikam shen ïa ki skhim ba la buh ha ki mat ilekshon hadien ka jingthaw sorkar ha ka jylla.
Ha ka jingïakren bad ki nongthoh khubor, u President jong ka seng Congress ha ka ri u Mallikarjun Kharge u la ong, “Hashwa ngi la dep ban pynbna ïa saw tylli ki jingkular ha kaba ïadei bad ka ilekshon bad nga pyntikna ba ka seng jong ngi kan sa lah ban pynurlong shen ïa ki hadien ka jingthaw sorkar.”
Ka seng Congress ka la dep ban pynbna ïa kane ka jingkular ha ka sien kaba nyngkong ha u Kyllalyngkot jong u snem ba la lah.
Ka seng hadien kane ka la ong, “Ban ïarap ïa ki Kannadigas ban ïakhun ha ka ban weng noh ïa ki jingeh kiba mih na ka jingkiewdor jong ki mar bad ban lah ban kynshew na ka bynta ki jingdonkam jong ngi kiba man ka sngi kum ka jingbam, ka pule-puthi na ka bynta ki khynnah, bad ka koit ka khiah, ka seng Congress lada ka wan ha ka bor synshar kan sa pynbiang ei kumba 200 Unit ka bording ilektrik sha man ki thliew ïing ha Karnataka.”
Ha kaba ïadei bad ka jingbuh jingkular ha ka sien kaba ar, ka seng ka la pynbna kumne, “Hapoh ka jingtreikam jong ka skhim man kawei pat kawei ka longkmie kaba shu shong ïing ka la shah kular ba kan sa ïoh T. 2,000 shisien shi bnai, lada jia ba ka seng ka wan ha ka bor synshar. Ka skhim ka ban ai jingmyntoi sha ki 1.5 klur ngut ki longkmie kiba shu shong ïing yn sa mang na ka bynta ka longkmie kaba long ka khliehduh jong ka longïing.”
Ka skhim ‘Anna Bhagya’ kan sa pynbiang khaw ei da kumba 10 kilo man u bnai na ka bynta ki briew kiba shah kynthup hapoh ka Below Poverty Line (BPL) ha ka jylla. Kum shi bynta ban ïakhun pyrshah ïa ka jingbym ïohkam-ïohjam, ka seng ka la pynbna da ka skhim Yuva Nidhi ha kaba la kular ban pynbiang da T. 3000 man u bnai sha ki samla kiba khlem kam khlem jam kiba la pule ha ka Graduation Degrees na ka bynta ar snem.
Kan sa pynbiang ruh da T. 1500 man u bnai kum ka jingkyrshan pisa na ka bynta kito ki samla kiba don ha ka Diploma bad ki bym ïohkam-ïohjamha ka jylla.
Ki paidbah mynta ki la angnud ba kine baroh kin sa urlong bad shaniah ïa ka sorkar ba kan lai ban ai jingkyrshan ïa ki khamtam hadien ba ki la ïohmad ïa bun ki jingeh bad ki la kular ruh ban ïai bteng ha ka ban ai jingkyrshan ïa ka seng na ka por sha ka por lada ka trei bha kumba ki la khmih lynti.
