Nongstoiñ, K’Lyngkot 08
Ka Coordination Committee jong ka West Khasi Hills Associations na ka 5th Meghalaya Games 2024, ka la ai khublei kitbok kitrwiang ïa kumba 183 ngut ki rang bad ki ‘thei ïalehkai ki ban leit ban ïashim bynta ha ka 5th Meghalaya Games 2024 ka ban long ha ka nongbah Tura.
Ïa katei ka jingïalang kitbok kitrwiang la pynlong ruh ha ka jingïalang hapoh TRYSEM Hall kaba ha ka ophis u DC ha Nongstoiñ haba u Deputy Commissioner ka West Khasi Hills u Bah Garod LSN Dykes (IAS) uba long ruh u Chairman ka Committee u la ai ka jingkren kitbok ki rwiang ïa baroh ki nongïalehkai.
Ka long ruh ka sien kaba nyngkong eh ha West Khasi Hills District ba ka jingdon jong u Bah Garod LSN Dyke kum u khlieh ka District la lah ban lum lang ïa baroh ki synjuk ialehkai jong ki jait jingïalehkai bapher bapher ha ka shatri jong ka Coordination committee na ka bynta ban mih-khmat ïa ka West Khasi Hills ha ki lympung ïalehkai ba kham heh hapoh ka Jylla.
Lah ban kdew hangne ba hapoh katei ka komiti ki don haduh 11 tylli ki synjuk ïalehkai kiba kynthup naduh ka Table Tennis, Basketball, Boxing, Volleyball, Cycling, Badminton, Archery, Arm Wrestling, Taekwon -do, Football bad ka Athletics.
Ha katei ka sngi nalor u DC la donglang ruh ka Kong B. Syiem, District Sports Offiecer (DSO) West Khasi Hills kum ka Vice Chairman, u Dr.LL Mawsor u ba long u Joint Secretary ka NDSA kum u Convener, u Bah GJL Sangriang kum u CDM na ka bynta ka WKH bad u Bah Affordstar Nongrem ACDM, ki rang bad ki ‘thei ïalehkai bad kiwei kiwei de.
U Deputy Commis-sioner ka West Khasi Hills u Bah Garod LSN Dykes IAS, haba kren ha katei ka sngi u la ong ba ka jingthmu ban thaw ïa katei ka komiti ka long ban wanrah ïa ka jingsngew ïa ïeit, sngew ïajan bad ym ban sngew nongwei ïa ki samla ïalehkai jong ka District bad ba kin don ka jingïakyrshan ia ki para ïalehkai jong ka District.
U DC u la kyntu ruh da kaba ong, “Sngewbha ym dei ban wanrah kano kano ka jingïasngewpher ha kajaka kaba phi ïalehkai bad wat nym pyni ïa ka mynsiem pher jait bynrjew ha kane ka Meghalaya Games namar ka dei hi ka jingkyntiew ïa ka kam ïalehkai ha ki jait jingïalehkai bapher bapher ha ki District bad ka Jylla hi baroh kawei.”
“Nga ai ka jingkitbok kit riwiang ïa phi ba phi lah ban ïalehkai bha bad haba phi leit na ka District ban ïashim bynta ha ki jingïalehkai bapher bapher, nga kyntu ba dei ban buh ïa ka thong bad leit da ka akor ka burom bad wan phai ruh da ka akor ka burom ” la bynrap u DC.
