Dhaka, Kyllalyngkot:
Ha kane ka khubor, la ong ba khlem jing artatien ka Sheikh Hasina sa shisien pat ka la jop biang ha ka jingiakhun ilekshon jongka ha kane ka por bad lada kheiñ kyllum baroh ki samoi ba ka Hasina ka la jop ha kane ka por kaba mut katei ka nongialam ba hakhlieh duh jong ka ri Bangladesh ka la jop ia ka ilekshon mynta la 5 samoi kynthih bad khlem don ba lah ban pynkhyllem ia ka ha kine ki 5 sien iakhun ilekshon.
La ong ba ka seng jong ka hasina ka la jop tam ia ka 50% ki shuki Myntri ha kane ka ilekshon ba mynta.
Kumta, la ong ba watla ki la mih shibun ki mat jingpyrshah haba iadei bad ka jinghiar ha ka rukom treikam jong ka sorkar jongka ha kine ki snem ba la leit. Pynban ki paidbah ki dang ai hi ka lad ia ka sorkar jongka ba kan synshar biang sa shisien wat hadien shibun kiei- kiei ki kynrum- kymram bad ki jingpyrshah jong kiba bun ba ka sorkar jongka kam lah ban pynbiang ha kine ki snem.
La ong ba ka seng jong ka Hasina kam shym kynduh wat tang uwei ruh u nongïakhun pyrshan u ban lah ban pynkhyllem ne ban knieh ia ki shuki jong ki Myntri jongka hynrei ki don pat katto katne ki konstitwensi kiba ka seng jongka kam shym la pynieng kyrtong namar kiwei pat ki daw.
Ka Hasina, ka la don 76 snem ka rta bad naduh ba ka sdang ban ïalap ilekshon ha kane ka sien ba mynta, ka la khot bad kyntu ia ki paidbah ba kin shaniah ha ka sorkar jongka naka bynta kine ki snem ki ban wan bad ba ka sorkar jongka kan ialeh ban tehlakam noh ia ki jingeh ba ki paidbah ki mad ha kane ka por.
Ha katei ka ilekshon, napdeng ki 300 tylli ki shuki Myntri ba la pynbna baroh, ka seng Awami Legaue jong ka Hasina ka la pynieng kyrtong na bynta ki 264 tylli ki shuki bad ka la jop pat 204 tylli baroh. Katba ka seng Jatiya Party kaba iateh lok badka pat ka la jop kumba 9 tylli ki shuki.
