Silchar, K’lyngkot:
Ki la don palat 100 ngut ki khynnah skul jong ka Ramakrishna Vidyapith Higher Secondary School ha Karimganj district kaba don ha Assam kiba la kem pang kynsan ha kaba kim tip briew shuh ha kine ki khyndiat sngi ba la leit kata ha ka sngi Thohdieng bad ka sngi Saitjaiñ.
Ki la don kumba katto katne ngut ki khynnah pule kiba la shah sumar ha ki Hospital, katba don kiwei pat kiba la shah phah noh sha ïing hadien ba ki la ïoh ïa ki jingsumar. Kane ka skul ka hap hapoh ka Ramakrishnanagar Assembly konstitwensi (ha kaba hashwa la tip ïa ka kum ka Ratabari Assembly konstitwensi), ka jaka kaba jngai da kumba 53km na Karimganj. Kumba la ïoh jingtip, la ong ba ki la don palat 50 ngut ki khynnah kiba la kem pang hadien ba ki la leit sha skul ha ka step jong ka sngi Thohdieng.
Ki la don kumba 27 ngut ki khynnah kiba la shah ïalam sha Hospital katba kiwei pat ki la koit noh hadien ba ki la ïoh ïa ki jingsumar. Kane ka jingjia ka la sdang ha ka por ba dang ïeng laiñ ha ka por mynstep ha katei ka skul, haba kawei na ki khynnah ka la kyllon bad kem pang kynsan kynsan bad hadien kane ki la don shuh shuh sa kiwei pat ki khynnah kiba la kem pang kumjuh. Ka skul ym slem ka la khang noh bad leh ïa kaba donkam. U Principal jong ka skul u Sharadindu Nath Mazumder u la ong ba ha ka sngi Thohdieng ka la dum ka buit ka stad naba ym lap ki daw kiba shai ha kano ka rukom kine ki khynnah ki la kem pang kynsan kynsan.
Ha ka sngi Saitjaiñ ki la jan don kumba 50 ngut ki khynnah kiba la kem pang hadien ba la dep ban ïeng Assembly, don kiba la ud king khlieh bad tlot bad ïa kine mar mar la kit sha ka jaka ai jingsumar. Ki la don kumba katto katne ngut ki khynnah kiba la shitom ha kaba ïadei bad ka rukom ring bad pynhiar mynsiem, king khlieh bad tlot. Lai ngut ki khynnah kynthei kiba la kham shitom jur la pynkynriah noh sha Silchar Medical College and Hospital (SMCH).
