Chennai, Kyllalyngkot:
Kiba bun ki bynta jong ka Tamil Nadu, khamtam ka nongbah Chennai, ki la ïohmad ïa ka jinghap jong u slap uba jur ha ka janmiet jong ka sngi U Blei,ha kaba kane ka la wanrah ïa ka jingshlei um ha ki lynti syngkien bad kumjuh ruh ka jingdheng kali ha kiba bun ki jaka sor.
Na ka daw jong ka jingjur palat jong u slap la rai ban ai shuti noh ïa baroh ki skul bad ki kolej kiba don ha kiba bun ki jaka jong ka Tamil Nadu. Ki skul bad ki kolej bad kiwei pat ki jaka pule kin sa khang ha Nagapattinam, Kilvelur Taluk, Viluppuram bad Cuddalore distrik ha Tamil Nadu namar ka jingjur slap.
Ki heh ba dei khmih ki la ong ba ki la rai ruh ban ai shuti ïa ki jaka pule kiba ha Ranipet, Vellore bad Tiruvannamalai.
Ki skul ha kine ki distrik ki la khang naduh hynnin ka sngi ka 8 tarik, Kyllalyngkot, la ïathuh shuh shuh ki heh ba dei khmih.
Ha kaba ïadei bad kane, ki nongleit jingleit ki la ïakynduh jingeh shibun na ka daw jong ka jingdheng ki kali ha ki surok bah ha Chennai namar ka jingshlei um naba bteng ka jinghap jong u slap.
Ka Regional Meteorological Centre (RMC) ha Chennai ka la dep ban ïathuh lypa shaphang ka jinghap jong u slap bajur ha kiba bun ki distrik kiba don ha Tamil Nadu ha kine ki sngi ban sa wan, la ïathuh ki nongthoh khubor.
Ka RMC ka la ïathuh lypa ruh ha kaba ïadei bad ka jinghap jong u slap uba jur ha ki jaka ba kham sha kyndong kiba don ha palat 10 tylli ki distrik jong ka jylla. Ha kaba ïadei bad ka jingïathuh lypa jong ka ha kaba ïadei bad ka jinglong ka suiñ bneng ha Tamil Nadu, ka RMC ka la ong, “Ka jinghap jong u slap uba jur kan sa long ruh ha ki jaka ba kham sha kyndong kiba don ha Villupuram, Tiruvannamalai, Ranipet, Vellore, Tiruvallur, Chennai, Ramanathapuram, Thoothukudi, bad Tirunelveli distrik bad ha Puducherry.”
