Peshawar, Kyllalyngkot:
Katkum ki khubor na Pakistan la iathuh ba hynriew ngut ki pulit pahara kiba don ha ka kam ban pyniaid ia ka prokram ai tika ‘Polio’ ha ka Lah Sngi U Blei ki la khlad noh na ka jingbthei u bom ha ka thaiñ Khyber Pakhtunkhwa jong ka Pakistan. Ha kane ka jingjia 22 ngut kiwei pat ki la mynsaw kynthup ia kiwei pat ki bor pahara kiba ia ap pahara ha katei ka jaka ryngkat bad kitei ki 6 ngut kiba khlad.
Kane ka la jia hapoh Mamund tehsil jong ka distrik Bajaur kaba don ha ki thaiñ khappud jong ka Pakistan bad Afghanistan.
La ong ba katei ka kynhun ki nong-ap pahara ka dang pynkhreh ban mih da ka kali (Van) ha katei ka por ba ki thmu ban leit ap pahara sha ka jaka ai tika Polio, ha kaba kynsan utei u bom uba khlaiñ bor u la bthei bad ngat ia kitei kiba don ha katei ka jaka baroh kynthup ia kitei ki 22 ngut kiba mynsaw lem bad 6 ngut ki pulit kiba leit ban pahara ha katei ka jaka.
Ia kitei kiba mynsaw baroh la pynkit noh sha ka hospital kaba don kham hajan. Na ka liang ki bor pyniaid hospital ki la iathuh ba la pynrung ia ki ha ka jaka sumar ba kyrkieh ‘Emergency’ namar ka jingma kaba ap ia ka jingim jong ki.
Shuh shuh ruh ki pulit haba iakren bad ki lad pathai khubor ha katei ka sngi, ki la pyntikna ba baroh kitei ki 6 ngut kiba khlad ki dei tang ki pulit bad kim shym don ki riew paidbah ki ban khlad ha katei ka jingjia.
U Myntri Rangbahduh ka Pakistan- u KPK Arshad Hussain u la pynrem jur halor katei ka jingjia bad ong ba ka sorkar kan ialeh ban iakhun bad ban tehlakam ia ki kam thombor jong ki lehnoh tad haduh ban da ioh ban pynduh jait ia baroh ki lehnoh kiba don ha kylleng ki bynta jong ka ri.
Namar la ong ba ki kynhun ba ju leit ban sam dawai Polio, ki long kiba ap jingma bha na ki kam thombor jong ki lehnoh hapoh Pakistan namar ka jingpyrshah jong ki lehnoh haba iadei bad katei ka jing-ai tika.
Tad haduh ba la ioh ia kane ka khubor ha ka step Lah Sngi U Blei, ym pat shym la don ba kam ne shim jingkit khlieh na ka liang jong ki kynhun lehnoh kiba don ha Pakistan haba iadei bad kane ka jingjia. Hynrei ki lehnoh Islam bad ki lehnoh Taliban jong ka Pakistan ki ju thombor man ka por khamtam ia ki nongtrei bad ki kynhun sam dawai Polio bad ia ki pulit ne ki nong-ap pahara ha kitei ki jaka kumba long ha kane ka jingjia.
