Kohima, Kyllalyngkot:
Ki la don saw ngut ki dkhot ba la ïatreilang bad ka kynhun Naga National Council (Non-Accordist) kiba la rai ban pyndem noh ha ryngkat ki tiar ïasiat hakhmat ka tnat shipai Assam Rifles ha Wakshing kaba don ha Mon distrik jong ka Nagaland ha ka 7 tarik, Kyllalyngkot.
Kumba la ïathuh ka tyllong khubor, la ong ba ki dkhot jong kane ka kynhun ki la trei borbah bha ha ka thaiñ bad ki la don bynta ha kiba bun ki kam pyntriem naduh u snem 2019.
Kumba la pynshisha halor ka jingjia, ka tnat Assam Rifles ka la pyllait ïa ka jingthoh ha ka Twitter kaba la ong, “Ka jingïakhun kaba khlem sangeh jong ki shipai ka tnat AssamRifles ka la pynlong ïa kine ki saw ngut ki dkhot ka kynhun Naga National Council (Non-Accordist) ba kin leit pyndem noh ha ryngkat kawei ka 9 mm Pistol ha Wakching, Mon District, Nagaland. Kine ki dkhot jong kane ka kynhun ki la sdang ban pynjur ïa ki kam pyntriem jong ki naduh u snem 2019.”
Ki heh ba dei khmih kim pat phah ïa ki jingbatai bniah ha kaba ïadei bad kane ka jingleit pyndem jong kine ki briew, khamtam ïa ki kyrteng, ki daw bad ki jingïasoi ba la pyntreikam jong kine ki lehnoh.
