Shillong, K’Lyngkot 08
Ka lympung ïalehkai Kalinga Super Cup 2024 kan sdang ha ka sngi Ba-ar ha Odisha bad ka ban kut haduh 28 tarik mynta u bnai.
Ha kane ka lympung ki don haduh 16 tylli ki kynhun ki ban ïashim bynta, kata 12 tylli na ka Indian Super League bad saw tylli na ka I-League, ha kaba la phiah ïa ki ha la ki jong ki group.
Ki kynhun ki ban wan ha ki kyrdan ba hakhlieh kin ïoh rung sha ka semi final bad ka kynhun ban khur ïa ka nam lahduh ka ïoh jaka na ka bynta ka 2024-25 AFC Champions League 2. Ka Odisha FC ka dei ka lahduh jong u snem ba la lah.
Ki kynhun kiba don ha ka Group-A ki kynthup ïa ka Mohun Bagan Super Giant, East Bengal FC, Hyderabad FC bad ka Sreenidi Deccan. Ha ka Group-B ki long ka Kerala Blasters FC, NorthEast United FC, Jamshedpur FC bad ka Shillong Lajong.
Ha ka Group-C ki long ka Mumbai City FC, Chennaiyin FC, Punjab FC bad ka Gokulam Kerala. Ha ka Group-D ki long ka FC Goa, Odisha FC, Bengaluru FC bad kawei pat ka ban ïoh rung na ka I-League.
Ki kynhun ki ban ïakhun ha kane ka sngi sdang kin long hapdeng ka East Bengal FC pyrshah ïa ka Hyderabad FC, ka Mohun Bagan Super Giant ïa ka Sreenidi Deccan, katba ka Shillong Lajong kan ïakhun nyngkong pyrshah ïa ka Kerala Blasters FC ha ka 10 tarik.
