Nongpoh, K’Lyngkot 08
Ka Ri Bhoi District Sports Association (RBDSA) ha ka Lah Sngi U Blei ka la pynlong ïa ka prokram kyrpang ban ai ka jingkitbok kitrwiang ïa ki ‘rang bad ‘thei ïalehkai phutbol jong ka District ki ban leit ïashim bynta ha ka 5th Meghalaya Games 2024 ka ban long ha ka nongbah Tura.
Ha kane ka sngi, uwei na ki ophisar ba la shongthait jong ka District Rural Development Agency (DRDA), u Bah Mathew Kenneth Makdoh u la wan ban shim ïa ka bynta kum u kongsan ha ka jingïadon ryngkat jong ki nongïalam ka RBDSA ba kynthup ïa u Bah R.B Shadap, President, u Bah G.S Shadap, General Secretary lem bad kiwei kiwei.
Haba ai jingkren lyngkot ha kane ka sngi sha ki rang bad ‘thei ïalehkai ka District, u Bah Mathew Kenneth Makdoh u la ai ka jingkitbok kitrwiang ïa ki samla ïalehkai ba kin lah ban ïalehkai bha hashwa ba kin mih na la ka District ban leit ïashim bynta ha katei ka Meghalaya Games 2024 kaba yn sa pynlong ha ka nongbah Tura.
U la kyntu ruh ba kum ki nongïalehkai, ki dei barabor ban long kiba tip ïa ka akor ka burom, la ka dei ha ka ktien ka thylliej ne ka riam ka beit bad bynrap ba ki jingpynshoi ki lah ban wan ha kiba bun ki rukom, hynrei kum ki samla ki dei ban long skhem ha ka jingmut jingpyrkhat bad ki kynmaw dngong ïa la ka tynrai bad ban pyni ïa kaba bha sha kiwei pat.
U Bah Makdoh u la ai ruh ïa ka jingkhublei ba kyrpang ïa ka Sorkar Jylla hapoh ka jingïalam jong u Conrad Kongkal Sangma kum u Myntri Rangbah, uba la shim khia ban pynlong biang ïa kane ka lympung kaba long kum ka rynsan kaba ailad ïa ki khun samla ka Jylla ba ki ïoh ban sei ïa la ka sap ka phong ha ki jingïalehkai bapher bapher.
Na ka liang ki nongïalam ka RBDSA nalor ka jingkitbok kitrwiang, ki la ai ruh ïa ki kyntien sneng kyntien khraw ïa ki samla ïalehkai shynrang bad kynthei ba ki dei ban long kiba tip ïa la ka akor ka burom bad ba kin pynleit jingmut ha ka jingïalehkai kaba ki leit bad ban ïoh ïa ka nam jop bad wanrah nam ïa ka shnong ka thaw bad ka District kaba ki mihkhmat, ym ban leit shang sngewbha ne shang kai.
