Jowai, K’lyngkot:
Ka Dorbar Shnong Khimusniang ha ka 6 tarik mynta u bnai ka la sdang ïa ka jinglehkmen ‘Platinum Jubilee’ ne ka lyngkhuh dap 75 snem ka jingïaid lynti ban shakri ïa ki paidbah nongshong shnong naduh ba la seng ïa ka ha u snem 1949 da ki 16 ngut ki ‘riew rangbah jong ka shnong.
Ïa kane ka Jubili kaba yn lehkmen baroh shisnem lynter bad ka ban kut ha ka 31 tarik, Nohprah 2024, la wan ban plie da u Chief Forest Officer ka JHADC uba dei u Waheh Shnong barim jong ka Dorbar Shnong Khimusniang, u Bah Frankie Well Blah ha ka jingdonlang u President ka Synjuk Waheh Shnong Jowai, Bah Jlan Kupar Rymbai kum u Symbud Kongsan.
U Bah Blah ha ka jingkren kum u Kongsan u la ai khublei kyrpang ïa ka Dorbar Shnong Khimusniang bad ïa ki nongkitkam barim bad kiba mynta kiba don ka jingpyrkhat jngai na bynta ka bha ka miat jong ka shnong ka thaw bad ka imlang-sahlang bad u pynpaw ruh ka jingsngewkmen halor ka jinglah jong ka shnong ban jam sha une u mawmer ba 75 snem.
U la ong ruh ba ha ki por ka jingbat jong u kum Waheh Shnong, ka jingïatreilang hapdeng ki nongïalam Shnong, ki longkmie longkpa bad ki samla ka dang don haduh ba la lah ban pynïaid shakhmat ïa kiba bun ki kam kumjuh ki kam pynroi pynpar hapoh ka shnong ka thaw.
“Hynrei haba phai ha kane ka juk kaba mynta, ka jingïalam jong ki longshuwa manshwa i kumba kan jah noh. Lada phai ha ka liang ki khun samla, kim treh shuh ban kit ban bah ïa ka khia ka shon jong ka shnong ka thaw bad ha ki jingdonkam jong ka shnong hap ban kyrpad da kiba bunsien ban ïadon bynta lang khnang ban lah ban pyndep bad pynïaid shakhmat ïa ki kam,” ong u Bah Blah.
Kumta u la kyntu ïa baroh ki khun ka shnong ban ïatreilang bad ka shnong ha kino-kino ki kam khnang ba ka Dorbar Shnong kan nang lah ban nangpynkhlaiñ shuh-shuh ïa ka rukom treikam na ka bynta ka bha ka miat jong ki nongshong shnong.
U Bah Jlan Kupar Passah ha ka jingkren u la ong katkum ka jingïohi jong u, ka Khimusniang ka dei kawei na ki shnong hapoh ka sor Jowai kaba la kiew bha ha ka liang ka roi ka par bad ka jingkhuid-jingsuba. Kumta u la kyntu ïa ki nongshong shnong ban bteng ka jingïatreilang bad ban don ka jingïatylli para nongshong shnong khnang ban nanglah shuh-shuh ban ïalam shakhmat ïa ka shnong ha ki sngi ki snem ban wan.
Ïa ka jingïalang la pyniaid da ka Kong Rinibeth Patlong bad Bah L. Lyngdoh ha ka jingdonlang ki Waheh shnong na ki shnong bapher ka sor Jowai, ki ‘riew rangbah ka shnong, ki longkmie longkpa, ki samla nalor kiwei kiba shah khot sngewbha.
Shuwa ka jingïalang, la ïoh ka jingkyrkhu duwai na u Pastor E. Nongpluh bad la ïoh ka jingkren pdiang na u Bah J.M. Pohsngap kumjuh ka jingkren lyngkot. ïa ka khana jong ka shnong na u Bah N.K. Lamare uba dei ruh u Chairman jong ka Souvenir Committee bad na u Waheh shnong, Bah A. Lamare.
U Kongsan u la plie ruh ia u maw sahnam jong ka jinglehkmen ïa ka Platinum Jubilee katba u Symbud Kongsan u la plie pyrda ïa ka dur ‘Mascot’ kaba dei ka dak jong ka jingrakhe 75 snem ka shnong bad ïa kane ka dur ‘Mascot’ la pynwandur da ka samla Wansaka E. Hinge.
La pynphuh pynphieng ïa ka jinglehkmen Platinum Jubilee da ki jingrwai jingshad ba la shim bynta da ki khynnah bad samla ka shnong Khimusniang.
Haba kut ka jingïalang u Pastor K. Syiemlieh u la pynkyntang bad ot ïa u ‘Cake’ Jubili.
