Shillong, K’Lyngkot 08
Ka Shillong Sports Association (SSA) ka la sdang ïa ka lympung ïalehkai Under-16 Boys Football League 2023-24 ha ka Lah Sngi U Blei ha SSA Stadium, Polo ha kaba ka Pay For Right Football Academy, Lah Bet FC, Mawreng SC bad ka Mawlai SC ki la khur ïa ka jingjop.
Ka jingpynlong ïa kane ka lympung ka long shi bynta ban kyntiew ïa ki khynnah kiba don ha ki sap ïalehkai phutbol bad ruh ban pyllait na ki jingsniew.
Ha kane ka jingïakhun, ka Pay For Right Football Academy ka la pynjem khnap noh ïa ka Umpling SC haduh 6-0 kol bad u Mewanlang Laloo u la khur ïa ka hat-trick.
Ha kane ka jingïakhun ki rangïalehkai ka PFR ki la ïakhun tyngeh naduh kaba sdang ha kaba ka la ïoh ban thep ar kol lyngba u Mewan Ryntathiang ha ka minit kaba 6 & 13. Tang hadien shiteng kynta kane ka kynhun ka la thep biang lyngba u Mewanlang Laloo ha ka minit kaba 35. Une u rangïalehkai shakhmat u la thep biang sa ar kol (40 & 43) na ka bynta ban khur syndon ïa ka hat-trick.
Hashwa ban wai ka PFR ka la ïoh ban thep biang sa shi kol lyngba u Kitboklang L. Marshillong ha ka minit kaba 45. Haduh kaba kut ka jingïalehkai ka Umpling kam shym la lah ban pynphai bad ka la mad ïa ka jingshah rem.
Ha ka jingïakhun kaba la long kham hashwa ka Lah Bet FC ka la pynliem noh ïa ka Lumshyiap SC lyngba ka shi kol ba la thep da u Robindor Kyrsiang ha ka mint kaba 15.
Kumjuh ka Mawreng SC ka la jop da 1-0 kol ïa ka Upper Shillong Colt bad kane ka la wan urlong lyng -ba u Bashemphang Jana, uba la thep ha ka minit kaba 39.
Haba phai sha kawei pat ka jingïakhun kaba khatduh, ka Maw-lai SC ka la pynliem noh ïa ka Ïaitylli SC da 2-0 kol. Ïa kine la thep da u Batista Langstieh ha ka minit kaba 50 bad u Pynshai Khongthohrem (59).
Ha kane ka lympung ki don haduh 13 tylli ki kynhun kiba kynthup ïa ka Labet FC, Umpling S.C, Lumshyiap S.C, Pay For Right Football Academy, Mawreng SC, Ïatylli S.C, Upper Shillong Colt, Mawlai S.C, Rangdajied United F.C, Umphyrnai S.C, Mawpat SC, Shillong Soccer Scout bad ka Merinda F.C.
Kane ka lympung kan bteng biang ha ka sngi Ba-ar ha kaba ka Lumshyiap S.C kan ïakhun pyrshah ia ka Upper Shillong Colt (9.30 AM), ka Umphyrnai S.C ïa ka Umpling S.C (11.00AM), ka Merinda F.C ïa ka Labet S.C (12.30 PM) bad ka Rangdajied United F.C ïa ka Mawpat S.C (2.00 PM).
