Jowai, K’Lyngkot 08
Ka lympung ïalehkai ki khynnah kiba hapoh 13 snem karta ba tip kum ka ‘Republic Day Cup Football Tournament’ ba la pynïaid da ka West Jaintia District Sports Associa -tion (WJDSA) ka la sdang ha ka lah sngi U Blei ha Kiang Nangbah Stadium, Jowai.
Kane ka jingïalehkai ka la sdang naduh ka por 9 baje mynstep haduh 11:30 mynstep da kaba phiah ïa ka madan ha ki ar bynta bad la don 18 tylli ki kynhun kiba ïashim bynta.
Ïa ki kynhun la bynta ha ki saw tylli ki Pool kynthup ka Pool A, B, C bad D.Ki kynhun kiba hap ha ka Pool-A, ki long ka Luti Tuber Ïalong, FAM, Ïawmusiang Nangbah bad Catholik Youth Mihmyntdu.
Ha ka Pool-B, ki long ka Mynthong, Panaliar, Dulong, Sabahmuswang bad Chutwakhu. Ha ka Pool-C, ka Sailung Ïalong, Ïongpiah, P.S.A bad Demthring. Katba ha ka Pool-C ki long ka Chilliangraij, Ïawmulong Nartiang, Lumkyrwiang, Ksehsylle Ïalong bad Khimusniang.
Haba phai sha ka jingïakhun, ka FAM ka la pynliem ïa ka Luti Tuber Ïalong da 3-0. Ïa kine la thep da u Dachanmitre Dkhar ha ka minit kaba 17 & 55 bad u Chelangki Shylla (25).
Ka Catholic Youth Mihmyntdu ka la pynliem ïa ka Ïawmusiang Nartiang da 3-0. U Wandame Phawa ula thep ar kol ha ka minit kaba 7 & 50 bad u Charelang Phawa (53).
Ka Panaliar ka la pynliem ïa ka Mynthong da 5-0 kol. U Sawa o Phira ula thep da ka hat-trick ha ka minit kaba 22, 30 & 35, u Lewa o Sumer ula thep ha ka minit kaba 45 bad u Lammiki Kynjing ha ka minit kaba 49.
Ka Sabahmuswang ka la pynliem ïa ka Dulong da 2-1. Ïa kine la thep da u Deiwaemitre Shylla ha ka minit kaba 7 & 13, katba ka kol jong ka Dulong la thep da u Ozil Langshiang ha ka minit kaba 28.
Ka Ïongpiah ka la pynliem ïa ka Sailung Ialong da 2-0 bad ïa kine ki kol jong ka Ïongpiah la thep da u Saiwotkibor Suwer ha ka minit kaba 18 bad u Kynsai Manner ha ka minit kaba 38.
Ha ka jingïalehkai kaba khatduh jong kane ka sngi, ka P.S.A ka la pynliem ïa ka Demthring da 4-0 kol. Ïa kine ki kol jong ka PSA la thep da u Shemiki Myrchiang ha ka minit kaba 35 & 39, u Deibormi Mulieh (58), bad u Wallam Pyrtuh (59).
