Guwahati, Kyllalyngkot:
Naba ka jingïalap ilekshon ka la kut noh na ka bynta ka North Cachar Hills Autonomous Council (NCHAC) ilekshon, palat T. 11 lak ka pisa ba la shah pynshisha ba ka dei kaba la thmu ban pynbam tyngka la ïoh ban kurup na u kyrtong jong ka seng Bharatiya Janata Party (BJP) bad na ki nongïarap jong u ha Hojai, Assam.
Hadien ba la ïoh jingtip halor kane, ka la don ka jingpyntreikam da ki heh sorkar jong ka Hojai distrik bad ki pulit ha kaba ki la lap ïa ar tylli ki kali hajan Lanka ha ka sngi U Blei.
Ha ka jingkhmih bniah, la lap ïa ki pla kiba don T. 11.5 lak ka pisa, ha kaba la suba ba la thmu ban pynbam tyngka sha ki nongthep vote hashwa ka ilekshon.
Ki la don kumba 8 ngut ki briew, kynthup u kyrtong jong ka seng BJP na ka bynta ka East Maibang konstitwensi, u Manjoy Langthasa, kiba la shahkem ha kaba ïadei bad ka jingdonkti ha ka jingjia.
U Langthasa u la jop ïa ka ilekshon ha kane ka konstitweisi khlem don nongïakhun pyrshah hadien ba baroh ki kyrtong ba la thmu ban ïakhun ki la weng noh ïa ki kot pynrung kyrteng jong ki.
” Ïa ka jingkhynra la pynlong ha National Highway 54 ha Shankardev Nagar. Ngi la ïoh ban kurup T. 11 lak 50 hajar na uba la shah kynnoh”, la ïathuh ki heh ba dei khmih.
Ïa ka kali, ïa kiba la shahkem bad ka pisa ba la ïoh ban kurup, la aiti sha ki pulit bad sha ka Election Commission na ka bynta ban bteng shuh shuh ïa ka jingtohkit kaba bniah bad ban leh ïa kaba donkam katkum ki kyndon aiñ.
