Imphal, Kyllalyngkot:
Ka kynhun lehnoh kaba la pynkhreh bha ïalade ka la thombor ïa ka Manipur Police Commando Complex bad kiwei pat ki jaka treikam jong ki shipai ïada ri ha ka jaka sor kaba don ha ka bynta khappud ha Moreh ha ka miet jong ka sngi U Blei. Ka jingthombor kaba la sdang ha ka por 7 baje janmiet, ka la wanrah ïa ka jingïasiat kaba markylliang kaba jur bha kaba la neh haduh ka por 10 mynmiet.
Kine ki lehnoh ki la don kumba 24 ngut ei ei, ki la pyndonkam da ki bom bad ki tiar siat ban thombor ïa ka Commando Complex, Moreh Bazaar, Ward Number 7, 9, bad ka Moreh Court Complex. Ka kynhun ïada ri kaba kynthup ïa ki shipai Assam Rifles, BSF, bad ki Commando jong ki pulit ka jylla ki la pynsted ïa ka jingpyntreikam bad ban pynibor pyrshah ha ka ban lah ban tehlakam ïa kane ka jingïasiat.
Wat lada ym shym la don kiba ïap ne mynsaw ha ka jingjia hapdeng ki shipai ha katei ka por ba la don ka jingïasiat kaba markylliang, ki pulit ki la suba ba ki la don kumba katto katne ngut ki lehnoh kiba la shah pynmynsaw ha ka por ba don ka jingïasiat.
Kane ka jingjia ka la jia hadien ka kam thombor kaba la jia ha ka miet jong ka 30 tarik, Nohprah, 2023, ha kaba ka la pynmynsaw ïa 11 ngut ki shipai ïada ri, kynthup ki shipai BSF. Ka jingjia shah thombor kaba la jia, ka la pynlong ïa ki heh ba dei khmih ba ki la dei ban pynjari da ka Curfew ha Moreh naduh ka 30 tarik, Nohprah, 2023. Ka daw halor ka jingshah thombor kam pat paw shai.
