New Delhi, Kyllalyngkot:
Ka sorkar Delhi ka la nang pynjlan shuh shuh ïa ka shuti Tlang ka ban long haduh ka 12 tarik, Kyllalyngkot na ka bynta baroh ki khynnah pule naduh ka klas Nursery haduh ka klas 5 na ka daw ba jur palat ka jingkhriat. Ha ka jingpyllait khubor ha ka X, ka Myntri ka Delhi ka Atishi ka la thoh: “Ki skul ha Delhi kin sa khang na ka bynta san sngi namar ka jingjur palat jong ka jingkhriat, kane kan long na ka bynta ki khynnah Nursery haduh klas 5.”
Ka sorkar Delhi, ha ka hukum kaba hashwa, ka la pynbna ban pynjlan ïa ka shuti haduh ka 10 tarik, Kyllalyngkot ha ki skul kiba hap hapoh ka jingkhmih jong ka sorkar bad kumjuh ha ki skul jong ki riewshimet namar ka jingjur palat ka jingkhriat.
Kane ka hukum ka la wan hadien ba ka India Meteorological Department ka la pynmih khubor ba la dei ban long kiba husiar na ka daw jong ka jingjur palat ka jingkhriat. Khyndiat kynta hadien ka hukum kaba hashwa, ka sorkar ka la pynbna halor ka hukum kaba thymmai kaba la long hynnin ka step.
