New Delhi, Kyllalyngkot:
Ha ka jingïalang kaba nyngkong ha kaba ïadei bad ka jingïasam ïa ki konstitwensi hapdeng ki seng kiba shah kynthup hapoh ka kynhun synrop INDIA, ka seng Congress bad ka Aam Aadmi Party la shem ba baroh ar ki la pynkhreh bad pynkhlaiñ bha ïa ka jingpyntreikam kumba la mut lypa.
U dkhot jong ka seng Congress u Mukul Wasnik uba la lamkhmat ïa ka kynhun u la ïakren bad ka seng AAP ha ka lah sngi U Blei.
Ha kane ka por, ka seng Congress ka la pynbna ba u nongïalam jong ka seng AAP u Arvind Kejriwal u la ai ïa ka rai ba ka seng jong u kan sa pynïakhun ïa u Chaitar Vasava na Bharuch Lok Sabha konstitwensi, shi sngi hashwa ka jingïalang.
Ïa ka seng AAP la mihkhmat da u National General Secretary (organisation) u Sandeep Pathak bad ki Myntri jong ka Delhi kiba kynthup ïa ka Atishi bad u Saurabh Bharadwaj ha ka jingïalang.
Kumba la ïathuh ka tyllong khubor, la ong ba ki seng ki la pyrshang ban trei na ka bynta ka jingïabhah ïa ki konstitwensi.
Ka seng AAP ka la ai jingmut ba lada ka seng Congress ka kwah ïa ki konstitwensi ha ki jylla ba synshar ka seng AAP kata ha Delhi bad Punjab, kan sa bhah ïa ki konstitwensi ha Haryana bad ha Gujarat.
Ka seng AAP ka la pyrshang na ka bynta ban nang pynbun shuh shuh ïa ki dienjat ha kine ki ar tylli ki jylla bad kwah ban ïakhun ïa ka ilekshon ha ki Lok Sabha konstitwensi.
Ka seng Congress ka la sdang ïa ka jingpyntreikam ha kaba ïadei bad ka jingïasam ïa ki konstitwensi bad ki seng ba la ïatreilang ha ka kynhun synrop jong ka INDIA, kane ka kynhun synrop kaba don ïa 28 tylli ki seng ka la don jingthmu na ka bynta ban ïathuh pyrshah ïa ka seng BJP kaba bat ïa ka jingsynhsar ha ka jingïakhun ïa ka ilekshon Lok Sabha 2024.
Kumba la ïathuh ka tyllong khubor, la ong ba ka seng ka la bthah ïa ki heh nongïalam ba ki la dei ban ïakren bad kiwei pat ki nongïalam jong ki seng ba la ïatreilang bad la ong ba ki la don kumba katto katne tylli ki jingïaphylliew jingmut ha kaba ïadei bad kiwei pat ki bynta ha kaba ïa kine la sdang ban ïakren.
