Jowai, K’Lyngkot 09
Ka Ïawmulong Nartiang, Kseh Sylle SC, Ïawmusiang Nangbah, Catholic Youth bad Panaliar ki la khur jingjop ha ka lympung ïalehkai U-13 Republic Day Cup Football Tournament’ ba la pynïaid da ka West Jaiñtia District Sports Association (WJDSA) ha Kiang Nangbah Stadium Ladthadlaboh, Jowai ha ka sngi Ba-ar.
Ha ka jingïalehkai kaba nyngkong, ka Iawmulong Nartiang ka la pynliem ïa ka Chilliangraij da 4-0 kol. Ïa kine kol la thep da u Y. Maskut ha ka minit kaba 7, u M. Maskut (25) bad ïa ki ar kol la thep da u K. Pyrtuh (42 & 47).
Ka Kseh sylle SC ka la pynliem ïa ka Lumkyrwiang SC da 3-0 kol. Ïa kine la thep da u Khainmi Pale (22), Emihashwa Dhar (50), bad Rijuban Dhar (53).
Ka Ïawmusiang Nangbah ka la pynliem ïa ka Luti Tuber lyngba ka shi kol ba la thep da u Kyrkhumitre Lamare ha ka minit kaba 42.
Ka Catholic Youth ka la pynliem ïa ka FAM lyngba ka shi kol ba la thep da u Wandame Pahwa ha ka minit kaba 27.
Ka Chutwakhu bad ka Mynthong ki la ïakhaid mar 1-1 kol. Ïa ka kol jong ka Mynthong la thep da u Jomison Shylla (5), hynrei ka Chutwakhu ka la pynphai kylla lyngba u Yokhain Pyrtuh (29).
Ka Panaliar ka la pynliem ïa ka Dulong da 4-2 kol. Ïa ki kol jong ka Panaliar la thep ar kol da u Sawa o Phira (9 & 22) bad u Lewa o Sumer (50 & 52), katba ïa ki kol jong ka Dulong la thep da u Ozil Langshiang (55 & 60).
