Bangkok, Kyllalyngkot:
Ha kane ka khubor la ong ba 15 ngut ki briew kiba kynthup ia ki khynnah, ki la duh noh ia ka jingim na ka jingshah ther ‘namding hapoh jong kawei ka shnong kaba don sha ka phang Northwest jong ka Myanmar.
Katei ka jingther bom jong kawei ka liengsuiñ ka la leit hap hapoh jong ka shnong Khampat Township, kaba don hapoh jong ka distrik Tamu bad kane ka la jia ha ka por kumba 10:15 jong ka Sngi Nyngkong.
Kumta, la ong ba 15 ngut ki la khlad noh bad kumba 20 ngut kiwei pat ki la ngat bad mynsaw ha katei ka jingjia.
Uwei na ki nongsakhi ha katei ka jingjia, u la iathuh ba katei ka liengsuiñ thma kaba ther bom ka dei ka liengsuiñ jong ki kynhun Junta bad ha ka jingshisha ki don 19 ngut kiba khlad kynthup ia 8 ngut ki khyllung- khynnah napdeng jong kitei kiba khlad baroh. Hynrei ki bor pyniaid pat ki la pynbna ba don tang 15 ngut kiba khlad na katei ka jingjia. Katba utei u rangbah uba sakhi ia katei ka jingjia u la phla ba ka jingdon jong kiba khlad ka dang lah ruh ban nang kiew shuh shuh nalor katei ka jingkheiñ kaba u la ai ha katei ka step.
Utei u briew u la iathuh ruh ba u bom ba nyngkong ba katei ka liengsuiñ Junta ka la ther u dei uba thmu ban pynbthei ia 2 tylli ki iingmane kiba don ha katei hi ka shnong bad utei u bom uba ar pat u long ia kito kiba paidbah kiba phet ruma hapdeng katei ka jingther bom jong katei ka liengsuiñ ki kynhun Junta.
