Shillong, K’Lyngkot 09
Ka kynhun ïalehkai Wushu ka Jylla hapoh ka lama jong ka Meghalaya Wushu Association (MWA) ka la wanrah burom da kaba khur takma ha ka East Zonal Khelo India Wushu Women’s League kaba la long ha Kokrajhar, Assam naduh 3 haduh 6 tarik mynta u Nohprah 2023.
Ha katei ka jingleit shim bynta katei ka kynhun hapoh ka jingïalam u Bah Donny R. Ranee kum u President ka MWA, ka la khur kawei ka takma rupa bad san ki takma rnong.
Ïa ka takma rupa la khur da ka Hammylienki Dkhar (East Jaiñtia Hills) ha ka Sanshou jong ka kyrdan ïalehkai 52 kg, katba ïa ki takma rnong la khur da ka Sesilia Dkhar (East Jaiñtia Hills) ha ka 45Kg Junior, Rijanai Ryndong (East Khasi Hills) ha ka 48 kg Junior, Ibalakordor Umdor (East Khasi Hills) ha ka 70Kg Senior, Balakynshew Lyngdoh (Ri-Bhoi District) ha ka Taolu Event Changquan lem bad ha ka Tai-Chi Quan da ka Espiranza Songthiang (East Khasi Hills).
Napdeng ki 17 ngut ki nongïalehkai ka Jylla, 9 ngut ki ‘thei ïalehkai ki la ïoh rung sha ka thup kaba phra bad ban ïoh ïa ka lad ban mihkhmat na ka Jylla sha ka East Zonal Khelo India ha ka All India Khelo India Championship ka ban sa long shen mynta u snem.
