Mumbai, K’lyngkot:
Ka kynhun Enforcement Directorate ne ka ED ha ka sngi Ba-ar ka la pynlong ïa ka jingleit khynra ha 7 tylli ki jaka kiba don ka jingïadei bad u MLA ka Shiv Sena (UBT) u Ravindra Waikar bad ki nongïarap jong u ha Mumbai ha kaba ïadei bad ka jingshah kynnoh donkti ha ka jingkamai ïa ka spah bymhok ha kaba ïadei bad ka jingshna ïa ka Luxury Hotel kaba don ha Jogeshwari, la ong ka kynhun tohkit.
Ka mukotduma ka don ka jingïadei ha kaba ïadei bad ka jingshna ïa ka Hotel ha Jogeshwari kumba la kynnoh ba ka la long na ka jaka ba la shna ïa kane ka jaka.
Ha u Naiwieng, ka kynhun ED hashwa ka la dep ban buh da ka jingujor mukotduma hapoh ka jingtreikam jong ka Prevention of Money Laundering Act (PMLA) pyrshah ïa u Ravindra Waikar ha kaba ïadei bad ka jingbamsap ïa ka pisa kaba T. 500 klur na ka 5-Star Hotel.
U Waikar u la shah kynnoh ba u la leh thok ïa ka Brihanmumbai Municipal Corporation da T. 500 klur halor ka jingïoh jingbit ban shna ïa kane ka Hotel ha ka jaka ba la mang na ka bynta ka BMC. U Waikar u la long u MLA na Jogeshwari East.
Kumba la ïoh jingtip, la ong ba u la ïajan bha bad u heh nongïalam jong ka seng Shiv Sena (UBT) bad u Myntri Rangbah barim jong ka Maharashtra u Uddhav Thackeray.
