New Delhi, Kyllalyngkot:
Ki bor pyniaid ka US ha ka Sngi U Blei ki la iathuh ba la shem ia ka jingkhang jong ka liengsuiñ Alaska Airlines kaba la lait ha ka por shiteng suiñ katba dang kit ia ki nongleit jingleit ha kane ka taiew ba la lah. Kumta, la ong ba kane ka long kum shi bynta na ka jingwad bniah ia ki daw jong katei ka jingjia kaba la wanrah jingma nongshong ha katei ka liengsuiñ.
Ka tnat National Transportation Safety Board (NTSB) ka la pyntip ba uwei u nonghikai ba la ithuh kyrteng kum u ‘Bob’ u la iohi bad lap ia katei ka jingkhang na ka bynta ba shadien jong ka nongbah Portland, hapoh ka thaiñ Oregon jong ka United States.
Kumta, ka nongialam jong ka NTSB- ka Jennifer Homendy ha katei ka Sngi U Blei ka la ong ba ka sngewkmen ban pynbna ba la lap ia katei ka jingkhang kaba lait ha katei ka jingjia, kaba la long kum shi bynta na ka jingseisoh haba iadei bad ka jingwad bniah jong ka tnat namar katei ka jingjia kaba la jia ha ka taiew ba la leit.
La ong ba bun tylli ki liengsuiñ ki la shah pynsangeh treikam noh ha katei ka sngi namar katei ka jingjia kaba la jia ia katei ka liengsuiñ Boeing 797 MAX9 ha katei ka por.
La ong ba kitei ki liengsuiñ Max9 ki long kiba kham kynrei bad kiba ju pyndonkam bha da ki tnat liengsuiñ Alaska bad United Airlines. Kiwei pat ki tnat liengsuiñ kiba ju pyndonkam ia kitei ki liengsuiñ MAX9 ki kynthup ia ki Kad Liengsuiñ na Turkey bad kiwei- kiwei de. Ka Boeing ka la lah ban pynmih haduh kumba 218 tylli kitei ki liengsuiñ 797 MAX bad kiba la pyndonkam da ki ri bapher jong ka pyrthei.
