Tel Aviv, Kyllalyngkot:
Ka tnat Iada jong ka Israel (Israel Defence Forces) ha kane ka por la ong ba ka la nang lap ksai shuh shuh ba ki lehnoh Hamas ki ioh jingkyrshan na ka Islamic Republic jong ka Iran. Ia kane la pynshisha da kaba lap ia ki tiar ba pyndonkam da ki lehnoh Hamas ha ki distrik Daraj bad Tuffah jong ka nongbah Gaza ba ki dei kiba na Iran. Namar kata, la pynshisha ba ki lehnoh Hamas ki ioh jingkyrshan na ka Iran ban leit hiar thma pyrshah ia ka Israel ha kane ka sien.
La ong ba ka kynhun shipai Nahal Brigade jong ka Israel ka la lap ia kitei ki tiar ba la pyndonkam da ki lehnoh Hamas bad la shem ba kitei ki tiar ki long katkum ka jingai jingiarap halor kumno ban pyndonkam bad ban shna ia kitei ki tiar ban wanrah pat ia ki tiar kiba khlaiñ ba ki lehnoh Hamas kin ioh ban pyndonkam ha ka jingiakhun thma pyrshah ia ka Israel.
Ia katei ka shlem pynmih tiar thma jong ka kynhun lehnoh Hamas la lap hapdeng ka jingleit khynra bad jingbud dien jong ki shipai Israel ia kawei ka lynti krem kaba jrong haduh kumba 330 phut ka jing jylliew bad jing jngai.
Dang ha kine ki khyndiat sngi ba la leit, la ong ba ki shipai Israel ki la lap ia shibun ki lehnoh, ki jaka rieh bad ki jaka treikam ba sop-sop jong kitei ki lehnoh Hamas.
Ki shipai Israel ki la lap ruh ia shibun tylli ki lynti krem ba ju pyndonkam da ki lehnoh Hamas baroh shi katta naduh shuwa ba kin sdang leit hiar thma ia ka Israel ha u Risaw jong u snem 2023 ba la lah.
Hynrei la ong ba ka ri kaba ai jingkyrshan sop-sop pat ia ka kynhun lehnoh Hamas la shem ba dei ka Iran bad ka ju ai jingkyrshan da kaba phah jingtip, ki tiar thma bad da ki jingtip jong kane ka juk stad saïan ba mynta. Kane ka jingshem ka la pynshisha ruh ia ka jing suba jong ka US ba ka Iran ka iatrei lang bad ka Hamas haba iadei bad ka jingleit hiar thma ia ka Israel ha ka 7 tarik u Risaw.
Kumba 1,200 tam ki nong Israel ki la duh ei ia ka jingim ha ka jingther bom bad jingleit hiar thma jong ki lehnoh Hamas pyrshah ia ka Israel ha ka 7 tarik u Risaw bad ki lehnoh Hamas ki la rahbor ruh da ki spah ngut ki briew na Israel sha Gaza kynthup naduh ki khyllung- khynnah, ki rangbah bad ki kynthei khlem jingsalia ne jingmap. Dei namar kane ruh ba ka Israel ka la khie bitar bad smai ba kan pynhiar kput ha ban da biang bad ba kan pynduh- pyndam noh syndon ia katei ka kynhun lehnoh Hamas ba shyrkhei ha kane ka sien mynta khnang ban tehlakam noh syndon ia baroh ki kam thombor ba katei ka kynhun lehnoh ka lah ban wanrah ia ka Israel bad ia ki ri ba marjan ha ki por ban wan.
