Shillong, K’Lyngkot 09
Ka Shillong Lajong FC kan sdang ïa ka jingïalehkai kaba nyngkong ha ka Kalinga Super Cup 2024 pyrshah ïa ka kynhun ïalehkai ISL, ka Kerala Blasters FC ka ban long ha ka sngi Balang ha ka por 2 baje janmiet ha Kalinga Stadium kaba ha Bhubaneswar.
Kane ka kynhun ïalehkai ka nongbah ka la don ha ka Group-B kaba kynthup lang ïa ka Kerala Blasters FC, North-East United FC bad ka Jamshedpur FC.
Kane ka long ka jingïalehkai kaba nyngkong ïa ka Lajong mynta u snem naduh ba ka la ïalehkai khatduh ha ka 23 tarik u Nohprah 2023 ha ka lympung ïalehkai I-League pyrshah ïa ka Namdhari.
Kumba ka paw kam long kaba suk ia ka Lajong ha kaba kan ïakynduh pyrshah ïa ka kynhun ïalehkai ba kynsai jong ka ISL bad ha kajuh ka por kane ka long ka jingïakhun kaba nyngkong eh ba kine ki kynhun kin ïakhun pyrshah.
Kane ka lympung ka ban ïakhun pyrshah hapdeng ki kynhun ïalehkai ISL bad I-League ka long ruh ka lad ban ïaknieh nam lahduh bad ruh ban ïoh rung sha ka AFC Champions League-2 Group 2024.
