Mawkyrwat, K’Lyngkot 09
Ka Shillong Lajong FC ka la jam sha ka semi final ha ka Mawlangwir Football Invitation Tournament 2023-24 hadien ba ka la lah ban pynliem noh ïa ka Nongbri Brothers FC da 4-2 kol ha ka sngi Ba-ar ha Rowell Lyngdoh Stadium Saitnad kaba ha Mawlangwir, South West Khasi Hills District.
Ka jingïalehkai ha kane ka sngi ka long shisha kaba itynnad bad pynhun ïa ki hajar ngut ki paidbah nongpeitkai. Ka Shillong Lajong ka la lah ban pyni ïa ka sap ïalehkai kaba itynnad ha kaba ka la ïoh ban pynkhih jar ha ka minit kaba 4 lyng-ba u Shano Tariang bad hadien katto katne por ka la pynbud biang ïa ka kol kaba ar lyngba u Deibor Tongper ha ka minit kaba 13 bad ïa kawei pat la thep da u Collin Lyngdoh ha ka minit kaba 39.
Ka Nongbri Brothers watla ka la shah tam lai kol, pynpaw kam shym la duh jingkyrmen bad ka la pyrshang ban ïalehkai bha bad pynpher ïa ka rukom ïalehkai bad dei ha ka minit kaba 42 shwa ban kut ka kylla step ka la pynphai kylla lyngba u Abell Matthew.
Haba phai sha ka kylla miet ka Nongbri Brothers ka la pyni shisha ïa ka sap ïalehkai kaba itynnad bad ïalehkai bha, hynrei da ka jingtbit ki rangïalehkai ka Shillong Lajong ka la pynlong ban thep biang sa shi kol lyngba u Collin Lyngdoh ha ka minit kaba 69.
Ka jingïalehkai ka la long kaba itynnad ha kaba ka Nongbri Brothers kam shym la duh jingkyrmen lyngba ka jingkyrshan ki paidbah bad lyngba ka jingïoh mynsiem ha kaba ka la lah ban thep kylla ha ka minit kba 80 lyngba u Abell Matthew.
Ha ka jingïakhun ha ki khyndiat minit shwa ban kut baroh artylli ki kynhun ki la ïakhun tyngeh kumjuh ruh ka Nongbri Brothers ka la ïaleh dohïap ban pynphai ïa ki kol, hynrei kam shym la lah ban pynurlong bad ha kaba kut ka Shillong Lajong ka la lah ban pynthikna ban jam sha ka semi final.
Ïa ka nam Man of the Match la khur da u Collin Lyndoh jong ka Shillong Lajong uba la thep ar kol.
Na ka liang ka Mawlangwir Sports Club ka la pyntip ruh ba ka jingïalehkai quarter final kaba ar jong kane ka lympung kan long hadpeng ka Langsning FC pyrshah ïa ka Golden Lion FC na Rymbai ha ka 17 tarik mynta u bnai.
