Jorhat, K’lyngkot:
Ki la don sa arngut ki briew kiba la shahkem ha ki pulit jong ka Assam ha kaba ïadei bad ka jingdonkti ha ka jingpynbthei bom ba la jia ha Jorhat.
Ïa kane la pyntip da u Superintendent of Police (SP) jong ka Jorhat distrik ha Assam u Mohan Lal Meena.
Ïa kine ki briew kiba la shahkem la tip kyrteng kum u Rajpal Gogoi bad u Biplab Baruah na Demow kaba don ha Sivasagar distrik jong ka Assam.
Ka jingbthei bom ka la jia ha Lichubari Military Camp kaba don ha Jorhat distrik jong ka Assam.
U Paresh Baruah uba la lamkhmat ïa ka seng ULFA-I u la kam ba ka seng ka la donkti ha ka jingpynbthei bom kaba la jia ha Jorhat distrik jong ka Assam ha ka 14 tarik, Nohprah jong u snem ba la lah.
Kumba la ïathuh ki pulit, la ong ba u Biplab Baruah bad u Rajpal Gogoi ki la phah ïa ar tylli ki bom kawang kti ha ka kali arshaka bad ieh ïa ki ha Teok kaba don ha Jorhat distrik jong ka Assam.
U Biplab bad u Rajpal, kumba la ïathuh da ki pulit, la ong ba ki la phah ïa kine ki bom da ka hukum jong u nongïalam jong ka seng ULFA-I u Aiseng Asom.
U SP u la ong: “Ïa u bom kawang kti la kawang ha ka jingjia kaba la jia ha Lichubari Military Camp kaba don ha Jorhat ha ka 14 tarik, Nohporah, 2023. Hadien kane ka jingjia, ka la don ka jingbuh jingujor. Ha ka 28 tarik, Nohprah, ngi la kem noh ïa ki arngut ki briew na ka bynta ban pynlong ïa ka jingtohkit halor ka jingjia: ïa u Achyut Gogoi bad u Biraj Kachari.”
“U briew u bym shym la lah ban ithuh u la phah ïa ka pisa kaba T. 5000 ha ka Bank Account jong u. Ngi la lap ïa kane lyngba ka jingwad bniah bad la tip ba une u briew uba la phah pisa sha u Biraj u dei u Rajpal Gogoi jong ka Demow. Ha kane ka por u Biplab Baruah, uba dei u nongshong shnong jong ka Demow u la shah set patok bad shah tohkit,” u la bynrap.
Shuh shuh la ïathuh ba ïa kitei ki bom kawang kti la leit shim da u Achyut Gogoi bad u Biraj Kachari na Teok kaba don ha Jorhat distrik jong ka Assam, ha kaba ki la kawang bad pynbthei ha ka Lichubari Miltary Camp kumba la thmu, la ïathuh ki pulit jong ka Assam.
“U Biplab u la phla ruh ba ma u bad u Rajpal ki la ai ïa uwei pat u bom kawang kti ha Sivasagar, bad ka jingtohkit ha kaba ïadei bad kane ka dang ïai bteng da ki pulit jong ka Sivasagar. Ngim pat lap ïa ka jingshisha ba kumno kine ki bom kawang kti ki la poi ha Assam,” la ong u SP.
