Shillong, K’Lyngkot 09
Ka Sorkar Jylla ka dang ïai pynkhreh shaid shaid ïa baroh ki jingdonkam na ka bynta ka 5th Megha-laya Games 2024 ka ban long ha ka nongbah Tura namar ka por ka sah satang shi taiew ban pyndep ïa kane ka lympung ka ban sdang naduh 15 haduh 20 tarik mynta u bnai 2024.
“Ngi la ïaid shaid shaid ïa baroh ki jingdonkam bad ki don ki bynta kiba ngi la jan pyndep ïa ki jingdonkam jong kane la lympung bad hashwa ka 12 tarik yn pyndep lut baroh ki jingdonkam jong ka Meghalaya Games,” la pynpaw u Myntri ka tnat ïalehkai ka Sorkar Jylla u Bah Shakliar Warjri haba ïakren bad ki nongthoh khubor ha ka sngi Ba-ar.
“Haba kheiñ lang baroh naduh ki nongïa-lehkai bad ki official na baroh ki distrrict bapher bapher jong ka Jylla ki la don haduh lai hajar tam. Te kumta ki jingpynkhreh naduh ki madan ïalehkai, ki jaka ïalehkai, ki jaka sah bad kiwei ki dangïaid shakhmat haduh mynta.”
Ha kaba ïadei bad ki lai tylli ki jingïalehkai tynrai ki ban sa pynrung hapoh ka Meghalaya Games, u Bah Warjri u la ong ba ïa kine yn sa lah ban pynthikna hashwa ka 12 tarik. “Kine ki jingïalehkai tynrai kin long kawei na Khasi, kawei na Jaiñtia bad kawei na Garo, hynrei ïa kine ngin sa lah ban pynthikna hashwa ka 12 tarik mynta u bnai.”
Ha kane ka sngi na ka liang ka tnat ïalehkai ka Sorkar Jylla ha ryngkat ka Meghalaya State Olym-pic Association, ki la pynlong ïa ka jingialang ha SSA Stadium Shillong na ka bynta ban aiti ïa ka sharak jong ka Meghalaya Games.
Ïa kane ka sharak la aiti da u Bah Shakliar sha u khlur nongmareh mara-thon barim ka Jylla u Bah Biningstar Lyngkhoi na ka bynta ban ïaid kylleng ka nongbah bad ban pynpoi sha Tura hashwa ban sdang katei ka lympung.
Nalor u kongsan, la ïadon lang ha kane ka sngi kynthup ïa ka Kong Isawanda Laloo, Director ka tnat Sports and Youth Affairs, kumjuh u Bah John F Kharshïing, Wor-king President ka Megha-laya State Olympic Asso -ciation, Bah Finely Pariat, General Secretary ka MSOA, Bah Dipshon Ryntathiang, Joint Secre-tary ka MSOA, ki District Sports Officer kiba kynthup ïa ka Kong Balarina Syiem, Bah Khroobok Passah uba long ruh u Asst. Director ka tnat Sports and Youth Affairs, Kong S. Rapsang bad O. Mawthoh bad kiwei.
