Ka jingpynkhreh na ka bynta ka ilekshon ban jied ïa ki dkhot lane MP ka Lok Sabha ka la sdang. Ka jingjop jong ka BJP ha ki lai tylli ki jylla – Madhya Pradesh, Rajasthan bad Chhattisgarh – ha ka ilekshon ba dang shen, ka la pynlong ïa kiba bun ban tharai ba kane ka seng ka la jop lypa ïa ka ilekshon MP. Watla ka Congress ka la jop ha Telangana, hynrei kiba bun kim pat ai jingkyrmen ïa kane ka seng lane ka kynhun synrop I.N.D.I.A ban poi sha ka thong. Ka jingpynsngew na kiba bun ba lang ka long beit ka dang shitom ban pynliem ïa u Narendra Modi. Ha ka jingshisha, ka jingïakren mynta lei ka long ba ka BJP kan ïoh palat 400 ngut ki MP tang marwei ha ka Parliament lane Lok Sabha kaba don 543 ngut ki MP! La sngewshyrkhei lypa ban sngap, hynrei ka lah ruh ban long ka jingshisha namar ngim lah ban len ïa ka jingshisha ba u Modi u long u nongïalam bad u Myntri Rangbahduh u bapawnam bad uba don ïa ka bor ban khring bad ban pynkohnguh ïa ki paidbah nongshong shnong. Kiba bun ki jied ïa u Modi bad kim tip mano ki kyrtong kiba ïakhun na ka BJP – tang namar ba ki la ïakhun na ka seng jong u Modi, kam don jingeh ïa ki ban jop ha ka ilekshon.
Ban jop pyrshah ïa ka BJP, ka kynhun I.N.D.I.A ka donkam ban ïakhun da kaba tyngeh bad kan hap long kaba stad ban ïasam ïa ki jaka ban ïakhun. Kane ka kynhun synrop jong ki liang pyrshah ka don haduh kumba 26 tylli ki seng saiñpyrthei. Lada ka rukom ïa ai bhah ïa ki jaka ïakhun hapdeng jong kine ki seng ka long kaba biang, ka BJP ka lah ban don ha ka jingsyier, hynrei lada bakla, kan long kumba ai lyer ïa ka BJP. Ha kajuh ka por, ki seng kiba don ha ka kynhun I.N.D.I.A ki dei ban pynduh noh ïa ka jingïashrut para ma ki. Kum ka nuksa, ka Congress bad ka Trinamool Congress kim lah ban peit slem iwei ïa iwei pat ha jylla West Bengal. Hato kane kan ktah ne em ïa ka jingai bhah ïa ki konstitwensi ba kin ïakhun? Lada ki poi sha u pud ba kam don jingïabeit, ka jingïohnong kan long na ka bynta ka BJP. Kan shong ruh ha ka jingstad jong kane ka kynhun synrop ha kano ka rukom kan rah ïa ki mat ki jura hakhmat ki paidbah bad kaei ka lynti ban poi sha ki jingangnud kiba bun. Ban shu beiñ shu khoh tang ïa u Modi marwei kan ym lah satia ban wanrah jingjop ïa kane ka kynhun. Ngin sa nang ïa peit nangne shakhmat kumno ka I.N.D.I.A kan leh halor kane ka bynta bakongsan.
Ka jingjop ne jingrem ha ka ilekshon MP Lok Sabha kan shong ha ka rukom buh ïa ki kyrtong. Kin don ki jaka ba baroh ki seng ha ka liang pyrshah kin hap ban sei kyrtong khnang ba ka ‘vote’ kan pait kan pra bad kan ym buh jingsuk ïa ka BJP ba kan jop. Hynrei kin don ruh ki jaka ba kan pynsuk ïa ka BJP lada la don bun palat ki kyrtong na ki seng kiba shong ha ka liang pyrshah. Ki jingïapynbeit na ka liang ka I.N.D.I.A kin san nang kham shai ha kine ki sngi ki ban wan. Tangba ki dei ban pynkynmaw ïalade ba katba ki nang ïa pait, katta kan nang suk ïa ka BJP bad ïa ka N.D.A ban jop da kaba suk bad ban wanphai sha ka bor synshar. Mynta ka shong sa ha kine ki 26 tylli ki seng kaei kaba kin leh khnang ba kan ym don ka jingpharia ïa ka ‘vote’ ka bym mon ïa ka BJP.
Ka BJP hapoh ka jingïalam jong u Narendra Modi ka la synshar mynta la jan don 10 snem ha Delhi. Ha kine ki 10 snem, ki la don bun bah ki kam kiba ka la leh kiba la pynkmen ïa ki paidbah bad don ruh ki kam kiba la pynsngewsih ïa ki nongshong shnong. Lada jia ba ki paidbah kiba bun ha kitei ki jylla kiba la long ilekshon ki kyntait ïa ka BJP, hato kan buh jingma ïa kane ka seng ha ka ilekshon MP Lok Sabha? Ka jubab ka long hooid bad em. Hooid – namar kan pyni ïa ka jingbitar jong ki paidbah ïa ka sorkar BJP, bad em – namar ka jingthep ‘vote’ ha ka ilekshon MLA bad MP ka ïapher. Lada ka Congress ka lah ban leh bha, kan ïoh mynsiem ban ïa aireng kham tyngeh bad ka BJP ha ka ilekshon MP namar ha u snem 2014 bad 2019, ka BJP ka la shu jop kput beit bad kam da donkam than ïa ka jingkyrshan na kiwei ki seng ban thaw sorkar. Tangba ki nongkyrshan jong ki seng bapher bapher kin ïa peit kliaw ïa ka jingmih na kane ka ilekshon khnang ba kin sngewthuh kumno ban leh na ka bynta ka ilekshon MP. Nangne shakhmat ka jingïakhun hapdeng ka I.N.D.I.A bad ka N.D.A kan long kaba itynnad. Haduh katno ki seng kiba don ha kine ki kynhun kin long kiba ïaineh? Hato kin don ki ban mih noh tang hadien katto katne por na ka I.N.D.I.A bad na ka N.D.A ban ïa ryngkang nawei shawei pat lane ba kin ïakhun la ka jong? Ka por kan sa batai ïa kine kiei-kiei.
