Shillong, K’Lyngkot 10
Ka Youth Star CC bad ka Lawsohtun CC ki la khur ïa ka jingjop ha ka lympung ïalehkai Third Division Shillong Cricket League 2024 ha ka sngi Ba-ar ha madan Urkaliar.
Ha ka jingïakhun kaba nyngkong, ka Youth Star ka la pynliem noh ïa ka Solidarity Club da 13 run. Ka Solidarity Club kaba la jop ïa ka kynting pisa, ka la ailad shwa ïa ka Youth Star ban tied nyngkong ha kaba ka la kamai 193 run bad shah pynhap 8 wiket ha ki 20 over. U Mrinmoy Das u la tied 33 run na ki 21 bol bad u Saurab Tiwari u la tied 32 run na ki 16 bol. Katba u Subham Sharma bad u Abhijit Barua ki la khur mar 2 wiket na ka bynta ka Solidarity Club.
Haba wan beh ïa ka thong, ka Solidirity Club ka la kamai tang 180 run bad shah pynhap 10 wiket ha ki 19.1 over. U Alok Kar u la ïoh ban khyrwit ïa ka shiteng spah run kaba 52 na ki 31 bol lem bad u Sunny Choudhary uba la khyrwit 51 run na ki 36 bol. Katba u Pranjal Dey u la khur 5 wiket bad ïa ki 2 wiket la khur da u Sagar Choudhary na ka bynta ka Youth Star. Ïa ka nam Player of the Match la khur da u Pranjal Dey.
Haba phai sha kawei pat ka jingïakhun kaba ar, ka Lawsohtun ka la jop da 5 wiket ïa ka Tur Shaphrang CC.
Ha kane ka jingïakhun ka Tur Shaphrang ka la kam trai ban tied nyngkong ha kaba ka la kamai 102 run bad shah pynhap 6 wiket ha ki 20 over. U Rimanlang Kharumnuid u la tied 23 run na ki 41 bol bad u Bankit Nongbet u la ïoh 18 run na ki 14 bol. Katba u Greatestful Lyngkhoi bad u Andrew B. Thabah ki la khur mar 2 wiket na ka bynta ka Lawsohtun.
Haba wan shimti ïa ka pali kaba ar, ka Lawsohtun ka la lah ban kynjoh sha ka thong da kaba kamai 107 run bad shah pynkhylem 5 wiket ha ki 16.5 over. U Larrykupar L Nonglait u la tied 35 run na ki 48 bol bad u Kyrmen Sohtun u la ïoh 29 run na ki 15 bol. Katba u Wanaibok Basaïawmait u la khur 2 wiket bad ïa ka shi wiket la khur da u Pynsuk Nongsiej. Ïa ka nam Player of the Match la khur da u Greatestful Lyngkhoi.
