Beijing, Kyllalyngkot:
Ka China ha ka Sngi Ba-ar ka la lah ban leit buh ia u kor Satellite ba ka la lah ban pynpoi sha haw-haw ha ka por 3:03 Baje Nohphai sngi jong ka 9 tarik u Kyllalyngkot 2024 bad la ong ba kane ka jingleit buh kor satellite jong ka China ha kane ka por ka long kaba ap jingma haduh katta khamtam ia ka Taiwan ba ka China ka la peit thuh bha ia ka jinglong- jingman bad ka jingiadei kam jong katei ka ri dew lynnong bad kiwei pat ki ri ha kylleng sawdong jongka.
Tang mar ia ioh khubor halor katei ka jingleit buh satellite jong ka China ha katei ka sngi, ki bor pyniaid jong ka Taiwan ki la maham ia ki paidbah kiba pyndonkam ia ki mobile phone jongki ba ki dei ban phikir bha ioh ka China kan ioh ban ring dur ia ka jinglong- jingman hapoh Taiwan lyngba ki mobile phone bad kiwei- kiwei ki lad kiba buhrieh ba ka China ka lah ban pyndonkam sop-sop.
Katkum ki kaiphod ba la ioh lum, la ong ba ka China ka la pynher ia utei u satellite na ka jaka pynher satellite hi kaba don ha ki bynta Southwest jong ka nongbah Sichuan, kumba 2,000 Kilometre lane kumba 1,243 Mile na ka nongbah Taipei jong ka Taiwan.
La iathuh ruh ba ia utei u kor satellite la ioh ban pynkiew shalor suiñ da kaba pynkit ha u roket ‘Long march-2c’ ba ju pyndonkam da ka China kum shi bynta ban poi sha katei ka bynta jong ka haw-haw ba la thmu ban leit buh ia utei u kor satellite.
kumta, la ong ba utei u satellite un long uba lah ban iohi lut ia ka jinglong- jingman ha kylleng sawdong jong ka China khamtam haba iadei bad ka Taiwan, ha kaba ka China mynta ka la lah ban iohi shai kyndiang ia kiei- kiei baroh bad ki rukom treikam jong ka Taiwan khlem da donkam shuh ban phah leit syntiat ne phah leit swait da ki liengsuiñ bad ki jhad kumba ka China ka ju leh baroh shi katta.
