Shillong, K’Lyngkot 10
Ka Sorkar Jylla ka la thmu ban plie lad ïa ki coach ka Jylla ba kin ïoh ki jingshah hikai (training) shabar khnang ba ki lah ban ïasam lem ïa ki buit ai jinghikai ba paka bad ban sei ïa ki nongïalehkai kiba kynsai ki ban paw haduh ka Olympic.
Ïa kane la pynpaw da u Myntri ka tnat ïalehkai ka Sorkar Jylla u Bah Shakliar Warjri ha ka jingïakren bad ki nongthoh khubor ha ka sngi Ba-ar hadien ba la dep ban aiti ïa ka sharak na ka bynta ka 5th Meghalaya Games 2024 ka ban long ha ka nongbah Tura naduh 15 haduh 20 tarik mynta u bnai 2024.
Dangshen ka Sorkar Jylla ka la wanrah ïa ki ‘riew shemphang kiba na Australia ba la tip kum ka Edge10 hapoh ka jingïa-lam u Ian Campbell, uba long u rangïalehkai Olym -pic barim na Australia. Kane ka jingthmu ka long ban khmih bniah ïa ki khynnah ïalehkai kiba don ïa ki sap ba kyrpang ha ki jingïalehkai bapher bapher.
Katei ka kynhun ka la sdang ban leit kylleng ki district ka Jylla naduh u snem 2022 bad ki la don kumba 4607 ngut ki khynnah kiba la wan ban shah tynjuh ïalade na ka bynta ban sngewthuh ha kino ki jingïalehkai ba ki kham tbit.
Napdeng kitei ki saw hajar shiteng ki khynnah, katei ka kynhun ka la ïoh ban jied sa tang kumba 200 ngut ki khynnah bad ha kaba kut ka la lah ban jied sa tang 11 ngut ki khynnah kiba kham kynsai kiba la ïoh rung sha ka ‘Super Elite Programme’.
Kine ki 11 ngut ki khynnah ki dei ki nongïa -lehkai Athletics, Weightlif -ting, Boxing, bad Karate.
“Ïa kine ki 11 ngut ki khynnah la ai jinghikai da ka kynhun jong ka Edge 10 lem bad ki coach ka Jylla. Ngi kyrmen ba kane ka jingai jinghikai da ka kynhun jong ka Edge10 kan long ruh ka jingïarap na ka bynta ki coach jong ki. Ha kajuh ka por ngi dang don ka jingïapyrkhat ban phah ïa ki coach jong ngi shabar ba kin ïoh ki jingshah hikai (training) bad ynda ki la pyndep ïa kita ki jingshai hikai, kin sa wan pat sha ka Jylla ban ai jinghikai ïa ki khynnah khnang ba ki lah ban sei ïa ki nongïalehkai ba kynsai ki ban paw ym tang hapoh ka ri, hynrei wat haduh ka Olympic,” la ong u Bah Shakliar.
“Ïa mynta ngi dangdon hapdeng ka jingpynkhreh bad ynda ngi la lah ban pyndep ïa kita baroh, ngin sa phah ïa ki coach ba kin ïoh ka jingshah hikai shabar.”
