New Delhi, K’lyngkot:
Watla ka Maldives ka don hapdeng ka jingbym iabeit bad ka India ha kane ka por, hynrei la ong ba u President ka Maldives- u Mohamed Muizzu ha ka Sngi Balang u la ong ba ka China ka long kawei na ki paralok ba iajan tam eh bad ka Maldives ha kane ka kynti.
La ong ba ki Myntri ka sorkar jong u, ki la shah pyrshah ha la ki jong hi ki para jaitbynriew kiba long ki Myntri Sorkar jong ka Maldives hi namar ka jingkren bakla bad ka jingkren pyrshah ia ka India bad ia u Myntri Rangbahduh ka India- u Narendra Modi.
Kumta, la ong ba u Muizzu u don hapdeng ka jingleit jurip ba 5 sngi jong u sha China, da kaba kdew ruh ba ka jingleit jurip ba nyngkong eh jong u sha China ka long ban ai jingkyrshan halor ka ‘Belt & Road Initiative’ jong ka China hapoh Maldives.
Haba ai jingkren hapoh China ha katei ka sngi, u Muizzu u la ai jingiaroh ia ki tnat kiba bei pisa ha kitei ki kam ba la pyntrei da ka China bad u la pynksan ruh ba ka jingiadei hapdeng ka Maldives bad ka China ka la neh slem bad ka long kaba skhem haduh katta ha baroh shi katta ki por ka jing iatreilang jongki.
Katkum ba u la ai jingkren ha katei ka sngi, la ong ba u Muizzu u la ong ba ka jingiadei hapdeng ka Maldives bad ka China naduh ki por barim hapdeng ka jingiatrei lang jongki haba iadei bad ka Maritime Silk Road, ka la pyni ia ka jingiadei kaba jan tam bad ka jingiadei kaba kyrpang hapdeng ka Maldives bad ka China naduh kitei ki por barim bad kumta ruh u la ong ba ka jingiadei hapdeng jong kine ki arliang ri kan nang kham bha shuh shuh lada ka China kan iatrei lang biang bad ka Maldives nangne shakhmat.
Haba phai pat sha ka jingthrang bad jing-angnud jong u ban ioh pynheh noh ia ka Central Airport bad ka Commercial Port, utei u President jong ka Maldives u la ong ba ka sorkar Maldives ka kwah ban nang pynskhem biang ia ka jingiadei bad ka China khnang ba yn lah ban pyniaid sha khmat ia kitei ki jing-angnud jong ka sorkar lyngba ki rukom jong ka ‘Belt & Road Initiative’ kumba long ha ki por ba la leit.
Ha kajuh ka por, u Muizzu u la pynbna ruh ia ka Free Trade Agreement (FTA) ba la dep ban iasoi hapdeng ka China bad ka Maldives ha kane ka por bad u la ong ruh ba katei ka jingiateh soskular hapdeng kitei ki arliang ri kan iarap ban kyntiew bun shah ia ka khaïi- pateng bad ka ioh- ka kot jong ka China bad kumjuh ruh jong ka Maldives ha kine ki sngi ban wan.
