Agartala, Kyllalyngkot:
Ki pulit jong ka Tripura ha ka sngi Ba-ar ki la pynlong ïa ka jingleit khynra drok bad ha kane ka jingpyntreikam ki la ïoh ban kurup ïa 1630 kilo u Cannabis ba la thad tyrkhong, ha kaba la antad ba une u la kot sha ka T. 1.6 klur.
Ïa kine ki jingdih pynbuaid la ïoh ban kurup na ka thaiñ Bet Bagan kaba don hajan ka Assam-Agartala National Highway Number 8, la ïathuh ki pulit.
Kumba la ïathuh ki pulit, la ong ba ka jingpyntreikam ka la long hadien ba la ïoh jingtip ba ka la don kawei ka trok 14 shaka kaba la kit ïa u Cannabis kaba la mih na Agartala.
Ka kynhun kaba kynthup ïa ki dkhot na ka tnat pulit ka Tripura, ka kynhun CRPF Battalion 140, 28 Battalion Assam Rifles, bad ka 3rd Battalion TSR, ha ryngkat u Executive Magistrate, ki la ïalumlang na ka bynta ban bat ïa kane ka trok, la ïathuh ki pulit.
Ka kynhun pulit ka la pynap shrip khnang ban lah ban khanglad ïa kane ka jingkhaïi ïa kine ki jingdih pynbuaid.
Haba la ïohbat ïa kane ka trok, ki pulit ki la pynlong ïa ka jingkhmih bniah ha kaba ki la shem ïa kine ki jingdih pynbuaid, la ïathuh shuh shuh ki pulit.
“Ngi la ïoh ban kurup ïa 1630 kilo u Cannabis, uba la kot sha ka T. 1.63 lak bad kem ïa uwei uba la donkti,” la ong u Avinash Rai, uba long u Superintendent of Police ha Dhalai.
Hashwa kane, hapoh ka jingtreikam jong ka ‘Nasha Mukt Tripura’ Campaign ha Dhalai, ki pulit ki la ïoh ban kurup kumba T. 36 klur u drok ba la shalan ha u snem ba la leit, ki la don ruh ki jingïoh ban kurup ïa ki jingdih pynbuaid ba la kot sha ka T.17 klur ha u snem 2022 bad T. 3 klur ha u snem 2021, la ong u SP jong ka Dhalai.
