Shillong, K’Lyngkot 10
Ka lympung ïalehkai Under-16 Boys Football League 2023-24 ba la pynïaid da ka Shillong Sports Association (SSA) ka la bteng biang ha ka sngi Balang ha kaba ka Upper Shillong Colt, Umphyrnai SC, Merinda FC bad ka Rangdajied United FC ki la khur ia ka jingjop ha ka sngi Balang.
Ha kane ka jingïakhun kaba la long ha SSA Stadium Polo, ka Upper Shillong Colt ka la pynliem noh ïa ka Lumshyiap SC da 2-0 kol.
Wat la kine ki kynhun kim shym la lah ban pynkhih jar ha ka kylla step, hynrei dei ha ka kylla miet ba ka Upper Shillong ka la lah ban thep ar kol lyngba u Damankhraw Syndor (50) bad u Mebanbhabok Sun (60+1).
Ha ka jingïakhun kaba ar, ka Umphyrnai SC ka la pynjem khnap ïa ka Umpling SC haduh 8-0 kol ha kaba u Batmeki Khar-kongor, Ricky Kharkongor bad u Vickyson Wankhar ki la ioh ban thep mar ar kol.
ïa kine kol la thep da u Batmeki Kharkongor (12 & 36), Arjuneson Kharkongor (36), Ricky Kharkongor (44 & 54), Iaiapynkmen Khar-kongor (51) bad u Vickyson Wankhar (58 & 60).
Ka Merinda FC ka la jop haduh 7-0 ïa ka Lah Bet SC bad u Bestius Nongbsab u la khur ïa ka hat-trick.
U Bestius Nongbsab u la thep ha ka minit kaba 54, 58 & 60, kumjuh u Kevin Kharbuki u la ïoh ban thep ar kol ha ka minit ba 3 & 55. ïa ki shi kol la thep da u Mebankitlang Mawlong (9) bad ia kawei la ïarap pynthep da u rangïalehkai ka Lah Bet u Stevenson Kharsahnoh (38).
Haba phai sha kawei pat ka jingïakhun, ka Rangdajied United FC ka la jop da 3-0 ïa ka Mawpat SC. ïa kine kol la thep da u Nicky Paul Marweiñ (34), Menangpyn -dap Khongjee (37) bad ïa kawei pat la ïarap pynthep da u rangïalehkai Mawpat u Domiwell Kharkongor (55).
Na ka liang ka SSA ka la pynbna ba ka jingïalehkai jong ka 1st Division Football League 2023-24, kan bteng ha ka sngi Palei ha kaba ka Mawkhar SC kan ïakhun pyrshah ïa ka Lawsohtun SC ha ka por 2:15 janmiet.
