Shillong, K’Lyngkot 10
Ka Shillong Lajong FC ka la mad ïa ka jingshah rem kaba nyngkong eh ha ka Kalinga Super Cup hadien ba shah pynliem noh ha ka kynhun ïalehkai Indian Super League, ka Kerala Blasters FC da 3-1 kol ha ka sngi Balang ha Kalinga Stadium kaba ha Bhubaneswar.
Ha kane ka jingïakhun ka Lajong ka la pyrshang ban ïakhun tyngeh naduh kaba sdang, hynrei kam shym la lah ban pynurlong na ka daw ba ka la pynlehnohei ïa ki kabu kiba biang. Hynrei ka Kerala Blasters ka la ïoh ban pynkhih jar nyngkong eh ha ka minit kaba 15 lyngba u rangïalehkai shakhmat na Ghana u Kwame Peprah.
Kane ka kynhun ïalehkai ISL ka la pynbud biang ïa ka kol kaba ar lyngba u Kwame ha ka minit kaba 27 na ka bynta ban tam da 2-0 kol. Hadien ar minit ka Shillong Lajong ka la lah ban pynphai kylla shi kol lyngba ka penalty ba la shut da u kapten u Renan Paulino De Souza hadien ba u Karim Samb was u la shah pynur hapoh ‘box’ da u rangapkol ka Kerala u Sachin Suresh.
Hadien ba la bteng ïa ka jingïakhun jong ka kylla miet, ka Kerala Blasters ka la ïakhun tyngeh bad dei ha ka minit kaba 46 ba ka la ïoh ban thep biang ïa ka kol kaba lai lyngba u Mohammed Aimen bad ha kaba kut kane ka kynhun ïalehkai na Kerala ka la khur ïa ki lai point.
Ka Shillong Lajong kan pyn-khreh ban ïakhun sa ïa kawei pat ka kynhun ïalehkai ISL ka North-East United FC ha ka 15 tarik mynta u bnai.
